Субвенционирано снабдување со електрична енергија преку ЕСМ продажба почна од 1 декември за пријавените и прифатени физички и правни лица регистрирани за вршење приоритетна дејност од областа на прехранбената индустрија, по шифри опфатени во одлуката на Владата
Фирми од прехранбената индустрија, кои на повикот на Владата за субвенционирано снабдување со електрична енергија, не се пријавиле или поднеле некомплетна документација, до 20 овој месец може да се пријават и од 1 јануари да бидат снабдувани преку „ЕСМ продажба“. Субвенционирано снабдување со електрична енергија преку „ЕСМ продажба“ почна од 1 декември за пријавените и прифатени физички и правни лица регистрирани за вршење приоритетна дејност од областа на прехранбената индустрија, по шифри опфатени во одлуката на Владата.
Одлуката на Владата со која на „ЕСМ продажба“ му се даде обврската за снабдување на дополнителен број потрошувачи, појаснуваат од ЕСМ, е донесена со цел да се спречи раст на цените на одредени прехранбени производи и да се постигне и нивно намалување.
„ЕСМ продажба“, по истата одлука, досега снабдува 309 јавни основни и средни училишта и 51 водостопанско и комунално претпријатие кои работат со пумпни или пречистителни станици.
Согласно владината одлука, како што неодамна информираше премиерот Димитар Ковачевски, се пријавиле вкупно 235 субјекти кои вршат производство на основните прехранбени производи како масло за јадење, леб, брашно,млечни и месни производи да се снабдуваат со струја по цена од 80 евра по мегават-час. Оваа мерка, според очекувањата на Владата, треба да ги стабилизира и намали цените на крајните прехранбени продукти.
На крајот на минатиот и почетокот на овој месец дел од компаниите од прехранбената индустрија и од месарниците рекоа дека нема да добијат субвенционирана струја. Иако се опфатени во мерката и аплицирале за снабдување со субвенционирана струја од 1 декември, некои од компаниите од прехранбената индустрија нема да склучат договори со ЕСМ за снабдување со струја по поевтина цена. Причината зошто апликациите не им биле прифатени е оти компаниите имале поставено фотоволтаици.
И од Групацијата за преработка на месо и производи од месо при Стопанската комора очекуваат мерката за струјата да биде јасна и целата работа да биде завршена со доставување на документацијата. Но, дел од компаниите се одбиени, а како што рекоа од Групацијата објаснување нема, а единствено заедничко е што имаат фотоволтаици.