Едиствената промена, од она што може да се забележи од соопштението од Министерството за правда, што е направена во содржината на предлог-законот, е амнестијата на лицата кои во странска држава направиле кривично дело, а казната ја издржуваат во земјава
Министерството за правда денеска преку писмено соопштение информира дека предлог-законот за амнестија, кој уште минатата недела се најде на владина седница, по што беше вратен на дополнително усогласување, добил „зелено светло“ на денешната седница на Владата.
За тоа дека предложениот закон ги претрпел потребните, како што вчера изјави премиерот, номотехнички усогласувања со секторот законодавство, денеска на прес-конференција потврди токму првиот човек на Владата.
„Тоа е направено во меѓувреме. Во текот на наредните два дена, министерот за правда Кренар Лога ќе има детален брифинг со претставниците на медиумите за овој закон, којшто истовремено ќе биде доставен до Собранието, што значи дека се работи за спроведена постапка. Министерот за правда, којшто ги знае сите детали во овој закон и за којшто тој веќе информираше и го имаше доставено на разгледување до пратеничките групи во Собранието пред да биде финално изготвен, ќе има детален брифинг со медиумите“,
рече премиерот Димитар Коваечвски на денешната прес-конференција.
Во денешното соопштение од Министерството за правда, во кое се информира дека предлог-законот сега ќе биде доставен во натамошна собраниска процедура, се објаснува за кого ќе важи предложената амнестија.
Едиствената промена, од она што може да се забележи од соопштението, што е направена во содржината на законот, е амнестија на лицата кои направиле кривично дело во странство, а казната ја издржуваат во земјава.
Закнот за амнестија што го предлага Лога ги опфаќа македонските државјани кои се осудени од странски или меѓународен суд согласно кривичните закони на странска држава, а казната ја издржуваат во С Македонија откако пресудата е признаена од надлежен суд во земјава, согласно ратификуван меѓународен договор.
Останатите одредби од предлог-законот, согласно дописот од Правда, не се променети.
Па така, со законот се предлага целосно ослободување на лицата на кои им е изречена казна затвор до шест месеци, а за осудениците кои со правосилна пресуда се осудени на казна затвор поголема од шест месеци, се предлага ослободување од издржувањето на 30 отсто од целокупната казна.
Законот за амнестија не се однесува на лицата кои се осудени на доживотен затвор, за кривично дело убиство, за кривични дела против изборите и гласањето, против половата слобода и половиот морал, против државата, против човечноста и меѓународното право.
„Амнестијата нема да важи за кривичните дела злоупотреба на службената положба и овластување од член 353, несовесно работење во службата од член 353-в, сите од Кривичниот законик, за кривични дела против јавниот ред од членовите 394 до 394-г од Кривичниот законик, како и за кривични дела сторени при вршење на семејно насилство и родово базирано насилство“,
се наведува во соопштението на Министерството за правда.
Амнестијата нема да важи ниту за кривичните дела разбојништво, разбојничка кражба, измама на штета на средствата на Европската Унија, перење пари и други приноси од казниво дело, злоупотреба на службената положба и овластување, несовесно работење во службата, примање поткуп, давање поткуп, давање награда за противзаконито влијание и за примање награда за противзаконито влијание, сите од Кривичниот законик.