Билатералните прашања мора да се решат меѓу засегнатите страни, вели германскиот министер за надворешни работи Хајко Маас
Османи е оптимист дека ќе биде послушан повикот за разум за надминување на отворените прашања меѓу двете земји
Бугарија е подготвена да ја преземе одговорноста за блокадата на С Македонија и евентуалните странски импликации потоа, рече бугарската министерка за надворешни работи Екатерина Захариева по состанокот на шефовите на дипломатиите на земјите од Берлинскиот процес, со кој копретседаваше со министерот Бујар Османи.
„Верувам дека Договорот за добрососедство од 2017 година, ако се исполнува со добра волја и совесно и ако не се бараат начини за заобиколување на неговите точки, ги има сите гаранции да се решат отворените прашања. За жал, тоа не го гледаме некое време и неколкупати сигнализиравме за тоа и зборувавме со колегите од С Македонија“,
додаде Захариева.
Таа вели дека само во последните месеци имаше повеќе од десет илјади негативни публикации со говор на омраза кон Бугарија и бара тие да не продолжат да се шират.
„Бугарија била и ќе биде една од државите што ќе ги поддржува земјите од Западен балкан, но и тие треба да имаат своја одговорност и да се насочат кон реформи. Не треба во ЕУ да бидат пренесени проблеми однадвор. Му благодарам на Хајко Маас и на неговиот тим што се обидуваат да помогнат, но ние како земји треба со добра волја да ги движиме отворените прашања напред за други министри по 30 години да не го доживуваат тоа што го доживуваме ние“,
рече Захариева.
Министерот Османи, пак, изрази надеж дека ќе биде послушан повикот за разум за надминување на отворените прашања меѓу двете земји.
„Не е тајна дека и покрај вложениот труд, како и интензивираната дипломатска активност и комуникација нашите две земји сè уште имаат одредени предизвици да најдат заедничко разбирање кое ќе помогне во усогласување на преговарачката рамка, која е предмет на дискусија во Брисел, како и разликите во очекувањата во нашите заемни односи. Сепак, ваквиот развој немаше негативни импликации врз Берлинскиот процес, што само по себе покажува нова политичка зрелост, каква не сме навикнати да гледаме често на Балканот. Јас сум оптимист, заедно имаме вложено многу. Сметам дека имаме пријатели кои не поддржуваат и помагаат, имаме заемен интерес да живееме во европски регион и на крај ние сме многу сме блиску за да не успееме да најдеме решение“,
рече Османи.
Германскиот министер за надворешни работи Хајко Маас на прес-конференцијата по состанокот, одговарајќи на новинарско прашање во врска со спорот меѓу двете земји, рече дека тие како германско претседателство со ЕУ, разговараат и со македонската страна, но и со Бугарија како земја членка. Нагласи дека во тие разговори се земаат предвид забелешките на двете страни. Но потенцира дека станува збор за билатерално прашање и оти решението мора да го најдат засегнатите земји.
„Во смисла на продолжување на процесот за интегрирање на Северна Македонија и Албанија во ЕУ морам да забележам дека кандидатот не треба да има нерешени прашања од каков било вид, било да се политички прашања или некакви историски настани во регионот. Таа земја ќе мора да разговара со земјата членка со која има проблем и ќе мора да најдат решение. Формирањето на Мешовитата македонско-бугарска комисија на историчари имаше задача да го реши тоа и се надевам дека ќе биде најдено решение на ова билатерално прашања, бидејќи колку подолго овие проблеми опстојуваат ќе биде тешко да се организира процесот на проширување и меѓувладината конференција“,
нагласи Маас.
Германскиот министер не даде конкретен одговор на прашањето дали со овие нови случувања на релација Скопје-Софија, со кои всушност се оневозможува непреченото интегрирање на Северна Македонија во ЕУ, се менуваат фундаментите на ЕУ.
„Работиме многу напорно во Советот за да го овозможиме следниот чекор во проширувањето да биде реализиран наскоро. И сето ова функционира согласно начелата на ЕУ. Унијата има 27 земји членки, а една од нив е Бугарија. И затоа треба да има разбирање со Бугарија. Интересот на Бугарија мора да се земе предвид, за жал таков е случајот, кога една земја се приклучува кон ЕУ преговарачката рамка за неа треба да биде одобрена од сите земји-членки“,
рече Маас.
Според него, ова е еден предуслов за одржување на Меѓувладината конференција и тој се заложи дека ќе се работи во таа насока согласно барањата на двете страни.
„Ние го правиме тоа во рамки на ЕУ, во рамки на нашето претседателство, но не можеме да носиме одлуки кои се однесуваат на билатерални прашања и во овој случај зависиме од она она што ќе го договорат Бугарија и Северна Македонија“,
додаде Маас.