Премиерот Зоран Заев од утрешниот самит во Софија очекува поддршка за сите земји од Западен Балкан, односно уште еднаш да се испрати пораката за отворање на поглавјата со Северна Македонија и Албанија.
„Утре очекувам сериозна поддршка за европскиот пат на сите шест земји членки од Западен Балкан кои сме кандидати и сакаме побрзо да станеме полноправни членки на ЕУ. И секако очекувам дека самитот на Берлинскиот процес утре ќе ја испрати уште еднаш пораката на почеток на преговорите односно отворањето на првите поглавја односно одржувањето на првите меѓувладини конференции на ЕУ со Република Албанија и со Република Северна Македонија“,
истакна Заев.
Тој уште еднаш повтори дека не постои друг пат, друга можност за подобра иднина освен отворени разговори, комуникација, размена на ставови.
„Се надевам дека утре на софискиот самит ќе имаме плодна дискусија со нашите европски пријатели и партнери. Свесни сме за тоа дека Европа кога го проценува нашиот напредок се повеќе во светло на динамиката на земјите во Европа и други места отколку од аспект на постигнување на целите, меѓутоа не постои друг начин освен да се избориме на тој пат да станеме членки и да ја зајакнеме соработката и да докажеме како балканска заедница дека припаѓаме во Европа“,
рече албанскиот премиер Еди Рама кој денеска го потпиша Меморандумот заедно со премиерите на С Македонија и Србија за соработка во услови на ковид-19.
Министрите за надворешни работи Бујар Османи и Екатерина Захариева денеска копретседаваа со состанокот на министрите за надворешни работи од Берлинскиот процес за Западен Балкан, како претходница на утрешниот самит.