Шпанскиот Сенат утре, првпат во својата историја, ќе одржи пленарна сесија без на неа да учествуваат избраните претставници. Освен историско значење за Шпанија, оваа пленарна сесија на Сенатот има исклучителна, и историска и стратегиска важност за Македонија.
Иако сите активности на Сенатот на Шпанија се суспендирани поради мерките за спречување на ширењето на коронавирусот, Горниот дом на шпанскиот парламент прави отстапка и ќе се состане да расправа и да гласа само за една точка на дневниот ред, а тоа е ратификација на Протоколот за пристапување на Северна Македонија во НАТО.
Шпанија е единствената членки на Алијансата која сè уште не го формализирала актот со кој на Северна Македонија ѝ се овозможува и официјално зачленување во НАТО.
Процедурата се одолговлекуваше поради политичката криза во Шпанија и неможноста по ланските априлски избори да се конституира шпанскиот парламент. Во ноември, на повторените избори, актуелниот премиер Педро Санчез, со низа компромиси кон партијата која се залага за независност на Каталонија, обезбеди парламентарно мнозинство.
Со тоа се отвори пат за отпочнување на процедурата за ратификација на Протоколот за пристапување на Северна Македонија во НАТО, која по предлог на шпанската влада се одвиваше по итна постапка.
По изгласувањето во Конгресот, односно Долниот дом на парламентот, следната фаза беше усвојувањето во Сенатот, но пред него се исправи проблемот со пандемијата на коронавирусот и воведувањето вонредни мерки во Шпанија, кои меѓу другото значеа и суспензија на сите активности на Сенатот.
Сепак, на вонредна средба на раководството на Сенатот со координаторите на парламентарните групи беше решено, поради важноста, утре да се одржи седница со единствена точка на дневниот ред, ратификација на Протоколот за пристапување на Северна Македонија во НАТО.
Како што јавуваат шпанските медиуми, на утрешната седница ќе присуствува само потесното раководство на Сенатот предводено од претседателката Марија Пилар Лоп Куенса, додека останатите сенатори својот глас ќе го дадат преку видеоконференциска врска. За гласање од далечина, според податоците од Сенатот, од вкупно 265, до денеска во 15 часот се пријавиле 247 сенатори.
Пленарната седница ќе се одржи во 16 часот, а според шпанските медиуми не се очекува да има дебата туку претседателката ќе побара веднаш да се гласа за точката на дневниот ред.
Донесениот акт ќе треба да го потпише шпанскиот крал, а потоа и да биде депониран во Стејт департментот во Вашингтон. Со предавање на ратификацискиот инструмент од Северна Македонија, исто така во Стејт департментот, и формално ќе заврши процедурата, со што Северна Македонија ќе стане 30. членка на Алијансата.