Правилникот ги уважува т.н. стекнати права, што значи дека не може со ревидирање на плановите да се намалат градбите. Министерот за транспорт и врски, Благој Бочварски, за „СамоПрашај.мк“ вели дека тоа се однесува само на веќе реализираните ДУП-ови и повика онаму каде што не е изградено, а планот е лош, веднаш да започне постапка за измена
Асоцијацијата на архитекти на Македонија (ААМ) реагира на измените во Правилникот за урбанистичко планирање, кој ги уважува т.н. стекнати права, односно да не може со ревидирање на плановите да се намали катноста на веќе предвидените градби. Оттаму велат дека Правилникот може да се толкува како упад во Законот за урбанистичко планирање и наведуваат повеќе точки каде што ќе има проблеми при донесувањето на урбанистичките планови.
„Конфликтот при изработката на донесувањето на урбанистичките планови со примената на овој став го гледаме со целите пропишани со Законот и тоа во однос на: рамномерниот просторен развој, рационалното уредување и користење на просторот, создавањето и унапредувањето на условите за хумано живеење и работа на граѓаните, надминување на урбаните бариери на лица со инвалидитет, одржлив просторен развој, спречување на квалитетот и унапредување на животната средина и природата, безбедноста од природни и технолошки катастрофи и хаварии, а понатаму и со начелата: интегрален пристап во планирањето, остварувањето на јавниот интерес и заштита на приватниот интерес, хоризонтална и вертикална усогласеност и координација во планирањето и уважување на научно и струлно утврдените факти и стандарди“,
велат од ААМ.
Експертите кои работеа на ревизија на детални урбанистички планови и претходно алармираа дека овој документ е уште една пречка што им ги врзува рацете да не можат да ја намалат висинатата поради т.н. „стекнати права“.
Министерот за транспорт и врски, Благој Бочварски во изјава за „СамоПрашај.мк“, вели дека измената се однесува на оние ДУП-ови коишто се веќе реализирани. Онаму каде не е изградено, а планот е лош, веднаш да започнат постапка за измена вели Бочварски.
„Се работи за планови каде што веќе се реализирани или има веќе изградено објекти во тие урбанистички планови, тоа е реализиран план, во таков случај треба да се земе предвид дека се работи за реализиран план, каде што веќе има изградени објекти по тој план којшто бил донесен во минатотото. Таму каде што нема реализиран план или нема реализирани објекти, доколку граѓаните сметаат и доколку општината смета дека тој ДУП ги надминува параметрите на ГУП, тогаш треба веднаш да започнат со измена на тој урбанистички план, низ сите процедури. Во Град Скопје секогаш е процедурата каде што се дава мислење, Град Скопје дава мислење и согласност за тоа дали тој ДУП е во согласност или не со ГУП. И заради тоа, таква опасност апсолутно нема, таму каде што не е реализиран планот. Секогаш може да се промени, да се намалат параметрите и тоа е секако дозволено согласно барањата коишто ги имаат граѓаните, советниците и сите заинтересирани страни“,
вели Бочварски и се жали што измените на Законот за урбанистичко планирање се блокирани во Собранието.
Од Асоцијата на архитекти велат дека дополнителна можна колизија при примената на овој став од Правилникот, би се остварила и со Законот за урбано зеленило кој пропишува минимален процент на зеленило при изработка на урбанистичките планови.
„Ставот е неприменлив при стратешко планирање преку изработка на генералните урбанистички планови, како и при промената на наменската употреба на земјиштето во урбанистичките планови. Неприменливоста на стаот ја гледаме и во крајно органичувачката рамка која се однесува на примената на споменатите параметри во него (коефицент на искористеност и процент на изграденост), особено во оние делови на урбанистичките планови кои навистина имаат можност и потреба за развој (како на пример градби за индивидуално домување – куќи или пак кај градби кои обавуваат јавни функции: образование, здравство, социјална заштита, културно наследство, заштита и спасување, инфраструктура, а индиректно и кај заштитата на животната средина и природата како и јавниот интерес кој е приоритетен согласно Законот). Накратко неговата примена овозможува огрнаичување на креативниот процес при планирањето кој цели кон хуманизација на просторот особено кај веќе дијагностицирани проблематични урбанистички решенија за коишто јавноста беше сведо во изминатиот период“,
велат од ААМ.