Од одобрените 65,7 милиони евра, 30,6 милиони евра ќе бидат директно префрлени во државниот буџет. Преостанатите средства ќе бидат достапни за инвестициски проекти преку Инвестициската рамка за Западен Балкан и ќе треба да поддржат стратешки инфраструктурни проекти во одржливиот транспорт, чистата енергија, дигитализацијата и развојот на човечкиот капитал
Европската комисија одобри и стави на располагање финансиски пакет во износ од 158,9 милиони евра за Северна Македонија, Албанија и Црна Гора, во рамките на Механизмот за реформи и раст кој е дел од Планот за раст на ЕУ за Западен Балкан.
Од вкупната сума, за Северна Македонија се издвоени 65,7 милиони евра. Оваа одлука е потврда за посветеноста на земјата кон реформите, исполнувањето на обврските од Планот за раст и спроведувањето на европските стандарди и вредности. Кај нас, фокусот на оценетите реформи беше ставен на областите на образованието и дигитализацијата, додека во Албанија, која добива 49 милиони евра, и Црна Гора – 44,2 милиони евра, акцентот беше на деловната конкурентност и иновациите.
Со денешната транша, вкупниот износ кој досега е ослободен во рамките на овој Механизам достигна 142,1 милиони евра за Северна Македонија, 212,8 милиони евра за Албанија и 89,3 милиони евра за Црна Гора.
Во земјава, позитивно оценетите реформи опфаќаат мерки за подобрување на финансирањето на основното и средното образование, како и проширување на пристапот до дигитална инфраструктура и ИТ опрема во училиштата.
Од одобрените 65,7 милиони евра, 30,6 милиони евра ќе бидат директно префрлени во државниот буџет.
Преостанатите средства ќе бидат достапни за инвестициски проекти преку Инвестициската рамка за Западен Балкан.
Откако ќе бидат одобрени од одборот на Инвестициската рамка за Западен Балкан, овие средства ќе поддржат стратешки инфраструктурни проекти во одржливиот транспорт, чистата енергија, дигитализацијата и развојот на човечкиот капитал. Сите проекти ќе се реализираат во тесна соработка со регионалните партнери и меѓународните финансиски институции.
Како што соопштија од Министерството за европски прашања, оваа поддршка од Брисел претставува силна потврда дека државата успешно ги спроведува реформите и ги реализира клучните приоритети во согласност со европските стандарди.
Денеска, првиот заменик претседател на Владата и министер за европски прашања, Беким Сали, ја поздрави одлуката на Европската комисија, потенцирајќи дека ова е важен сигнал на доверба за реформската агенда.
„Европската интеграција повеќе не е само политичка аспирација. Денес таа се претвора во конкретни инвестиции, поддршка и реални можности за нашите граѓани“,
вели министерот Сали.
Од ресорното министерство додаваат дека овие средства се дополнителен мотив за продолжување на реформите и зајакнување на институциите со цел забрзување на европскиот пат. Од Министерството за европски прашања велат дека остануваат целосно посветени на ефикасната координација на процесите, со цел европската помош директно да се преточи во подобар животен стандард за македонските граѓани.
Информацијата од Европската комисија ја сподели и министерот за надворешни работи и надворешна трговија, Тимчо Муцунски, кој вели дека ова е јасна потврда за силната посветеност на Владата кон реформите, исполнувањето на обврските од Планот за раст и имплементацијата на европските вредности и стандарди на домашен план. Воедно, како што вели, тоа претставува признание за сериозниот пристап, институционалниот капацитет и реформскиот напредок на државата.