Изјaвата на премиерот доаѓа откако Основното јавно обвинителство за гонење организиран криминал и корупција (ОЈО ГОКК) денеска потврди дека кон крајот на минатата година отворило предистражна постапка по известување од МВР за сомнежи дека од информатичкиот систем во Кабинетот на претседателката на државата неовластено биле извлекувани податоци
Од Министерството за внатрешни работи потврдуваат дека до Секторот за компјутерски криминал од ОЈО ГОКК добиле две наредби во врска со случајот – едната од 12 февруари, а другата од 25 март оваа година, посочувајќи дека станува збор за поголема количина на електронски доказен материјал за чија анализа е потребен поголем временски период
Сомнежите за наводна шпионска афера во Кабинетот на претседателката на државата, Гордана Сиљановска-Давкова, премиерот Христијан Мицкоски им ги препиша на, како што ги нарече, шпионски талог и структури од минатото кои се претставуваат како група вработени во Министерството за внатрешни работи (МВР).
Наведе дека овие структури испраќаат анонимни дописи до обвинителства, притоа споменувајќи го шефот на Обвинителството за гонење организиран криминал и корупција (ОЈО ГОКК), Ислам Абази, за кого рече дека бил веднаш подготвен да истрча и да создаде паника во јавноста.
Премиерот ова го кажа одговарајќи на новинарско прашање дали има некакви сознанија за наводната шпионска афера во претседателскиот кабинет и доколку има, дали може да сподели детали.
„Па, видете, тоа се шпионски талог на општеството, структури од минатото коишто се наоѓале во кабинетите како глодари на некои поранешни политичари – претседатели, премиери итн., и тие се претставуваат како група вработени и испраќаат анонимни дописи до обвинителства, се разбира, таму е Ислам Абази веднаш да истрча и да создаде паника во јавноста дека нешто се случувало. Јас не би ги коментирал овие глодари бидејќи мислам дека треба да ги заборавиме“,
рече Мицкоски одговарајќи на новинарско прашања по поставувањето камен-темелник на доградба на ООУ „Јоаким Крчовски“ во населеното место Волково-Орман, општина Ѓорче Петров.
Што кажаа од ОЈО ГОКК
Основното јавно обвинителство за гонење организиран криминал и корупција (ОЈО ГОКК) денеска потврди дека кон крајот на минатата година отворило предистражна постапка по известување за сомнежи дека од информатичкиот систем во Кабинетот на претседателката на државата, Гордана Сиљановска-Давкова, неовластено биле извлекувани содржини, односно податоци.
Како што информираа од ОЈО ГОКК, сè започнало на 18 декември минатата година, кога од Секторот за компјутерски криминал на МВР до нив стигнало известување за настан од 24 ноември истата година, а во врска со индиции за недозволени активности во Кабинетот на претседателката на државата.
Сепак, иако станува збор за сензитивен и сериозен случај, и по неколку месеци Обвинителството сè уште не ги добило од Министерството за внатрешни работи (МВР) резултатите од бараните анализи.
Дополнително, како што може да се заклучи од информациите на Обвинителството, постојат основи на сомнение за вклученост на едно лице во случајот, кое во оваа фаза од постапката се води како пријавен.
Според ОЈО ГОКК, од Секторот за компјутерски криминал биле барани анализи за екстрахираниот доказен материјал, а од Кабинетот на претседателката на државата копии од видеозаписите од безбедносните камери поврзани со настанот и периодот во кој тој се случил.
Копии од видеозаписите не добиле бидејќи од Кабинетот ги упатиле на Службата за општи и заеднички работи, а оттаму, пак, во Министерството за внатрешни работи (МВР).
„Од СОЗР беше добиено известување дека институцијата не располага со видеозаписи, туку дека нивната надлежност се однесува исклучиво на набавка на опремата, додека чувањето и располагањето со копиите од записите е во надлежност на МВР. И покрај тоа, од страна на МВР до денес не се доставени повратни информации, ниту известување за преземени дејствија во врска со обезбедувањето на копиите од видеонадзорот“,
велат од ОЈО ГОКК.
На 25 март надлежниот јавен обвинител до Секторот за компјутерски криминал на МВР доставил наредба за анализа на податоците од мобилните телефони, како и заедничка анализа на податоците што биле екстрахирани од компјутерската опрема обработена во Истражниот центар на ОЈО ГОКК, а дополнително била побарана и анализа на постапувањето по судската наредба за увид и пребарување во информативниот систем на Кабинетот на претседателката, со задолжение од обвинителството да биде доставено известување за прибраните докази.
До денес, како што велат од Обвинителството за гонење организиран криминал и корупција, и покрај сериозноста на предметот, чувствителноста на околностите и значењето на навременото постапување, немаат добиено известување од МВР за резултатите од преземените дејствија, ниту за прибраните докази.
МВР: Се работи за обемен материјал за кој треба време
Од Министерството за внатрешни работи потврдуваат дека до Секторот за компјутерски криминал од ОЈО ГОКК добиле две наредби во врска случајот – едната од 12 февруари, а другата од 25 март оваа година, посочувајќи дека станува збор за поголема количина на електронски доказен материјал за чија анализа е потребен поголем временски период.
„Во тек е анализа на сите електронски докази кои се екстрахирани од одземената опрема. Напоменуваме дека станува збор за поголема количина на електронски доказен материјал за кој е потребен поголем временски период. Анализата е во завршна фаза и во наредниот период целокупниот доказен материјал ќе биде доставен до ОЈО за ГОКК. По целосно расчистување на случајот јасноста ќе биде соодветно известена“,
велат од Министерството за внатрешни работи за „360 степени“.
Весникот „Слободен печат“ вчера објави дека до неговата редакција стигнала анонимна кривична пријава што била поднесена до ОЈО ГОКК, потпишана од „група вработени во МВР“. Според пријавата, пишува весникот, во Кабинетот на претседателката се копирале и енкриптирале, односно шифрирале податоци со таен код, кои наводно требало да завршат во рацете на странски разузнавачки служби.
Според информациите наведени во пријавата, под сомнение е ИТ-администратор во Кабинетот на претседателката, кој наводно копирал, енкриптирал и складирал доверливи податоци и бил поврзан со разузнавачка служба. Во пријавата, како што пишува „Слободен печат“ се споменувале и други функционери од Кабинетот и од Агенцијата за разузнавање, за кои имало сомнежи дека можеби учествувале во прикривање на доказите, па дури и високи владини функционери кои наводно ургирале кај претседателката и кај обвинителот да го затворат случајот.
Потпишаните на пријавата барале отворање на постапка со друг обвинител, форензичко вештачење на сите електронски уреди, сервери, телефони и медиуми користени од лицата, прибирање на видеонадзор, логови, ВПН-записи, електронска комуникација и пристапни листи, проверка на евентуално компромитирани класифицирани информации и НАТО-комуникации, пишува весникот.
Во врска со наводите на ОЈО ГОКК, како и за пријавата испратена во редакцијата на весникот, засега нема реакција од Кабинетот на претседателката на државата.