Оттаму посочуваат дека со оглед на тоа што се работи за име на историска личност, а земајќи го предвид фактот дека не постои регистар за историски личности со кој ќе се утврди на статусот на личноста, Министерството за правда не издаде одобрение за употреба на името ,,Иван Михајлов‘‘ во името на здружението
Министерството за правда нема дадено согласност за употреба на името на здружението „Иван Михајлов“ во Битола, реагираат оттаму откако денеска Комисијата за спречување и заштита од дискриминација (КСЗД) утврди дискриминација по основа на национална и етничка припадност за основањето на бугарското здружение, посочувајќи и директна дискриминација од страна на Министерството поради тоа што на здружението му се овозможило да врши дискриминација.
Оттаму посочуваат дека со оглед на тоа што се работи за име на историска личност, а земајќи го предвид фактот дека не постои регистар за историски личности со кој ќе се утврди на статусот на личноста, Министерството за правда не издаде одобрение за употреба на името ,,Иван Михајлов‘‘ во името на здружението.
„Министерството за правда нема дадено согласност за употреба на името “Иван Михајлов’. Во однос на постапката за регистрација на здружението, до Министерството за правда на ден 27.02.2019 година доставено е барање за давање на согласност за регистрација во Централен регистар. Министерството за правда со допис од 05.03.2019 година достави одговор на барањето со кое се известува подносителот дека согласно член 9 став (1) од Законот за здруженија и фондации, Министерството за правда издава одобрение за употреба на зборот ‘Македонија’, зборовите изведени од него, како и неговите кратенки, за употреба во името на организацијата“,
посочуваат од Министерството.
Во врска со наводите изнесени од страна на претседателката на КСЗД, Весна Бендевска, од Правда информираат дека немаат никаква надлежност да вршат надзор над работата на здруженијата.
„Согласно член 58 од Законот за здруженија и фондации, Министерството за правда единствено е надлежно да врши надзор на законитоста на примената на одредбите од законот“,
додаваат оттаму.
Претходно денеска претседателката на Комисијата за спречување и заштита од дискриминација (КСЗД) Весна Бендевска на прес-конференција кажа дека Комисијата утврдила дискриминација по основа на национална и етничка припадност за основањето на здружението Културен центар „Иван Михајлов” – Битола.
КСЗД утврди и индиректна дискриминација извршена од страна на Министерството за правда поради пропуштање на извршување на своите законски надлежности, со кои му овозможиле на Здружението да врши дискриминација, односно вознемирување што е забрането со одредбите од законот за спречување и заштита од дискриминација.