ВМРО-ДПМНЕ да не бара алиби, туку да подготви амандмани за актуелниот предлог нa закон за јавно обвинителство, ѝ порачуваат на опозициската партијата од Министерството за правда.
„Законот за јавно обвинителство се изготвуваше долг временски период во Министерството за правда, од работна група во која учествуваа домашни експерти, научната јавност, јавни обвинители, но исто така и странски експерти и дури странски јавни обвинители кои даваат сугестии и мислења за одредени прашања поврзани со законот. Законот е сè уште на маса и доколку ВМРО-ДПМНЕ сака да учествува во процесот тогаш нека подготви амандмани на овој текст – се останато е алиби за неносење на законот“,
велат од Министерството за правда.
Нивната реакција следува откако Христијан Мицкоски на прес-конференција денеска порача дека не го поддржуваат законскиот текст предложен од Правда и предложи да се формира тим од експерти професори што ќе го напише законот.
Тој предложи тимот да биде од шестмина професори по уставно и казнено право: Владо Камбоски, Гордана Силјановска-Давкова, Никола Тупанчевски, Гордан Калајџиев, Тања Каракамишева и Гордана Лажетиќ.
Отворени се, рече тој, и за други имиња во експертскиот тим.
„Без да го гледаме ќе го поддржиме законот што тие ќе го предложат“,
рече Мицкоски кој смета дека одложувањето на изборите поради овој закон е само изговор на Зоран Заев со кој бега од пораз и одговорност.
Претходно, од Министерството за правда посочија дека и во текот на денов ќе продолжат билатерални средби со претставниците на пратеничките групи на кои се разгледуваат нивните амандмани за законот за јавно обвинителство, а целта на средбите е обезбедување на двотретинско мнозинство.
Вчера оттаму најавија дека ако се обезбеди потребното мнозинство, предлог-законот ќе се најде на владина седница, а потоа ќе се пушти и во собраниска процедура. Меѓутоа, засега нема такви најави, а во краткото соопштение од Владата со кое се најавува денешната седница, не се споменува законот за ЈО.