Во текот на денов ќе продолжат билатерални средби со претставниците на пратеничките групи на кои се разгледуваат нивните амандмани за законот за јавно обвинителство, потврдуваат од Министерството за правда.
Од Министерството информираат дека целта на тие средби е обезбедување консензус и двотретинско мнозинство.
Вчера оттаму најавија дека ако се обезбеди потребното мнозинство, предлог-законот ќе се најде на владина седница, а потоа ќе се пушти и во собраниска процедура. Меѓутоа, засега нема такви најави, а во краткото соопштение од Владата со кое се најавува денешната седница, не се споменува законот за ЈО.
Овој закон вчера бил тема и на средбата на групата независни пратеници од ВМРО-ДПМНЕ со амбасадорката на САД, Кејт Мари Брнс.
„Одржав продуктивна средба со групата независни пратеници денеска, за важноста од поддршката на континуираните реформи, вклучувајќи го и законот за јавното обвинителство, кој ги унапредува целите за владеење на правото, транспарентност, одговорност и добро владеење“,
напиша на својот твитер-профил Брнс.
По последната средба на работната група во петокот, некои пратенички групи викендов доставиле амандмани за законот за јавно обвинителство, а некои замолиле за дополнително време за да ги формулираат поради обврските што ги имаа со Жан Моне дијалогот.
За ВМРО-ДПМНЕ е прифатливо законско решение што ќе го изработат и ќе произлезе од самата експертска јавност која беше вклучена во јавната дебата за законот за јавното обвинителство, вели лидерот на опозициската партија Христијан Мицкоски.
„Потребно е квалитетно законско решение, а не онакво какво што власта турка на мала врата на само недела и пол пред распуштање на парламентот. Затоа за ВМРО-ДПМНЕ, со цел да не се робува на суетата на одредени министри и стравот на Заев од одговорност, е прифатливо законско решение што ќе го изработат и ќе произлезе од самата експертска јавност која беше вклучена во јавната дебата за законот за јавното обвинителство“,
наведе Мицкоски во пишана изјава.
Мицкоски повикува да не се креира законско решение за, како што наведува, заштита на партиските интереси на поединци, туку решение предложено од експерти кое ќе биде прифатливо за Собранието.
Лидерот на СДСМ, Зоран Заев, пак, вели дека законот за јавното обвинителство, како и протоколот за НАТО и законот за одбраната, се дел од агендата што е договорена од сите партии да се заврши до распуштањето на Собранието на 12 февруари. Ако некој го прекрши тоа, тогаш, како што рече Заев, ќе се одложи распуштањето на парламентот и распишувањето на изборите.