Амбасадорката на САД во земјава Кејт Мари Брнс денеска се сретна со независните пратеници од ВМРО-ДПМНЕ. Една од темите за кои разговарале бил и законот за ЈО, објави Брнс на својот Твитер профил.
„Имавме продуктивна средба со групата независни пратеници за важноста за поддршка на континуираните реформи, вклучително и законот за јавни обвинители со кој се унапредуваат целите на владеењето на правото, транспарентноста, одговорноста и доброто управување“,
напиша Брнс.
Независната пратеничка група од ВМРО-ДПМНЕ пред почетокот на средбите на пратеничките групи за предлог законот кон крајот на минатиот месец побара законот за јавно обвинителство, кој го предлага Министерството за правда, веднаш да се достави до Собранието за да имаат увид во текстот.
„Крајно несериозно е една година неколку луѓе, а не Собранието, преку пратениците да имаат разговори зад затворени врати. Процесот треба да биде инклузивен, освен ако обете партии не сакаат политички договор наместо добар закон“,
наведоа тогаш од оваа пратеничка група.
Лидерот на СДСМ Зоран Заев досега неколкупати изјави дека има сериозна надеж дека оваа пратеничка група ќе се вклучи и ќе го поддржи носењето на законот и дека тие ќе бидат првите со кои ќе разговара и од кои ќе бара поддршка за обезбедување на двотретинско мнозинство.