Во моментот кога претставници на медиумите влегле во собраниската сала, опозициските пратеници во српското собрание ги подигнале транспарентите во знак на поддршка за телевизиите Н1 и Нова С кои од синоќа не ги емитуваат своите програми
Откако поставуваа пратенички прашања, пратениците од опозицијата во српското собрание денеска во собраниската сала во знак на поддршка држеа транспаренти на кои пишуваше: „Мрак во Србија без слободни медиуми“ – истата фраза која на црна заднина се прикажува на телевизиите Н1 и Нова С, откако тие од синоќа не ги емитуваат своите програми, јави Данас.
Во моментот кога претставници на медиумите влегле во собраниската сала, како што јавуваат српските медиуми, пратениците од пратеничките групи на Обединети, Народна партија, Демократска партија, Морамо-Заједно и Зелено-лев клуб ги подигнале транспарентите во знак на поддршка за телевизиите Н1 и Нова С.
Претседателката на опозициската пратеничка група Обединети, Мариника Тепиќ, преку објава на својот твитер-профил ги поддржа новинарите и уредниците на телевизиите Н1 и Нова С.
„Медиумскиот мрак во Србија го стега обрачот, а оваа задача освен владата ја извршува и државниот Телеком“,
напиша таа и додаде дека вака ќе изгледа Србија ако се дозволи прогон на независните медиуми.
Podrška za novinare i urednike
— Marinika Tepić (@MarinikaTepic) December 6, 2022
TV N1 i Nova S❗️
Medijski mrak u Srbiji steže obruč, a osim vlasti taj zadatak izvršava i državni Telekom. Ovako će Srbija izgledati ako dozvolimo progon nezavisnih medija! Dok nam Telekom zavlači ruku u džep da nas za naše pare njihivi mediji lažu! pic.twitter.com/DWtIivK4hb
Натан Албахари, од опозициското Движење на слободни граѓани, на Твитер напиша дека ја поддржува борбата на Н1 и Нова С за слобода на медиумите.
„Нема демократија без слободни медиуми“,
вели тој.
Danas smo na sednici podržali @N1infoBG i @tvnova_s u borbi za medijske slobode. Nema demokratije bez slobodnih medija. pic.twitter.com/Rd5yWhW8aI
— Natan Albahari (@albahari_n) December 6, 2022
Двете телевизии од полноќ на 6 декември не ја емитуваат својата програма во Србија, а гледачите наидуваат на црн екран на кој пишува „Мрак во Србија без слободни медиуми“.
Истиот натпис го објавија и на своите социјални мрежи и притоа не ги наведоа причините за ваквиот потег.
Засега не е познато до кога Н1 и Нова С нема да ја емитуваат програмата.