Координаторот на пратеничката група на ВМРО-ДПМНЕ, Никола Мицевски, во процедурално обраќање кажа дека нивната партија е против дополнителни задолжувања, но како што кажа, за да не бидат кочничари, ќе ги поддржат овие предлог-закони. Во таа насока, Мицевски нагласи дека ММФ и Светската банка ќе го контролираат трошењето на јавните пари и нема да дозволат Владата да краде како до сега
Пратениците на денешната 92 пленарна седница изгласаа по скратена постапка да биде донесен предлог-законот за задолжување на земјава кај Меѓународниот монетарен фонд (ММФ) со кредитна линија за претпазливост и ликвидност. Воедно, изгласаа и по скратена постапка да биде донесен предлог-законот за задолжување на Северна Македонија со заем кај Меѓународната банка за обнова и развој – Светска банка.
Координаторот на пратеничката група на ВМРО-ДПМНЕ, Никола Мицевски, во процедурално обраќање кажа дека нивната партија е против дополнителни задолжувања, но како што кажа, за да не бидат кочничари, ќе ги поддржат овие предлог-закони. Во таа насока, Мицевски нагласи дека ММФ и Светската банка ќе го контролираат трошењето на јавните пари и нема да дозволат Владата да краде како до сега.
„Овие денешни закони доаѓаат во една многу лоша економска состојба, која е аларманта. Јавниот долг од 2017 година е зголемен за три милијарди евра, односно за 600 милиони евра годишно. Принципиелно сме против задолжувањето што само вие знаете да го направите, без одредени мерки и визија за продолжување натаму, зашто цената на крајот ќе ја платат граѓаните, а може да се доведе во ризик и обезбедувањето пензија, исплата на плати, студентскиот стандард и сите реакции на граѓаните“,
рече Мицевски и додаде дека лошите економски перформанси на Владата ги гледаат меѓународните финансиски институции и банките и затоа задолжувањето со еврообврзница ќе биде исклучително скапо и со камата од осум проценти.
Пратеникот на ВМРО-ДПМНЕ, Јован Јаулевски побара дневниот ред на седницата да биде дополнет со точка Предлог-законот за субвенциониран студентски оброк, но неговиот предлог беше одбиен од страна на претседателот на Собранието Талат Џафери. Таа точка, како што посочи Џафери, е ставена на дневен ред на заседанието што ќе се одржи на 16 ноември.