Вицепремиерот за економски прашања Фатмир Битиќи непосредно пред завршување на расправата изрази разочараност од дискусиите помеѓу членовите на Комисијата во изминатите два дена
Денешната комисиска расправа за продолжување на рокот за енергетската кризна состојба заврши со партиски расправии меѓу пратениците од ВМРО-ДПМНЕ и СДСМ. Дали државата ќе ја продолжи кризната состојба во енергетиката пратениците ќе расправаат и утре, кога се очекува да продолжи собраниската Комисија за одбрана и безбедност.
Комисијата втор ден расправаше за предлог одлуките за продолжување на роковите за постоење на кризна состојба на целата територија на државава заради недостиг на електрична енергија, и за постоење на кризна состојба на подрачјето на Град Скопје, заради недостиг на топлинска енергија, можноста за користење на алтернативно гориво и состојбите на пазарот на топлинска енергија. Со предлог одлуките треба да се објави кризна состојба во периодот од 1 октомври годинава до 30 април следната година. Со тоа ќе се овозможи продолжување на кризната состојба во енергетската област, што со одлука на владата стапи во сила од почетокот на овој месец.
Според пратениците од опозициската ВМРО -ДПМНЕ, причината за лошата состојба со електричната енергија во земјава се должи на недомаќинското работење и намалено производство на електрична енергија.
„Се повикувате на тоа дека имаме многу високи цени на светските берзи по мегават од час, меѓутоа имаме услови за домашно производство од домашните производни капацитети кои доколку се искористат ќе немавме потреба од увоз на електричина енергија и скандалоззни набавки“,
истакна пратеникот од ВМРО-ДПМНЕ, Дејанчо Ефтимов.
Според него, стабилна состојба може да се постигне само со искористување на капацитетите и одговорност на надлежните.
„Ниту се посегнало кон план за надминување на оваа криза, ниту пак имаме никаков друг план освен пренамена на средства за што не добиваме детален извештај, каде овие средства се потрошиле. Енормно многу се краде енергија тоа значи дека во Македонија не функционира системот“,
оцени Ефтимов.
Марија Георгиевска од СДСМ во реплика посочи на погрешниот пристап односно, како што рече, на еднострано презентирање на податоците објавени преку Еуростат без притоа да се споменат другите фактори кои имаат влијание врз цената.
„Треба да имаме предвид дека секоја земја има различен енергетски систем фактори, колку од компаниите во земјите се на слободен пазар и колкава е таа потрошувачка. Исто така, треба да се земе во предвид и тоа дали земјата увезува електрична енергија и колкав процент, а тоа зависи од тоа како е спремен буџетот во дадената земја така да постапува, бидејќи не се исти земјите со кои правиме споредба. Да не се врзуваме спрема еден параметар, има фактори кои влијаат на формирањето на цената, не само кај нас, туку и кај останатите држави и не може да правиме еднострана споредба. Оваа криза не натера да ги погледнеме аномалиите кои треба во наредниот период да се следат и да бидат показател за да знаеме како да ги контролираме нашите акции и реакции“,
потенцира Георгиевска.
Пратеникот Ефтимов во контрареплика го повтори ставот дека во изминатите години требало да се зголеми наместо да се намали домашното производство што рече дека е причина што земјава во моментот е увозно зависна.
„ЕСМ во изминатите 10 години има намалување од 40 отсто. Ако во овие десет години се зголемило производството, така ќе биле заштедени во буџетот енормни средства кои сега ќе можевме да ги алоцираме на други соодветни мерки кои ќе се од помош за граѓаните“,
рече Ефтимов.
Тој додаде дека одговорното искористување на ресурсите ќе спречело многу компании да не се затворат или да бидат на работ на егзистенција, намалување на стандардот на живеење, инфлацијата, како и оптоварен систем на социјална заштита.
Вицепремиерот за економски прашања Фатмир Битиќи непосредно пред завршување на расправата изрази разочараност од дискусиите помеѓу членовите на Комисијата во изминатите два дена.
„Сметам дека расправата од овие два дена не доликува на еден законодавен дом, да се упатуваат такви критики на луѓе кои не се присутни се недолични, бидејќи треба да расправаме како да се справиме со енергетска криза, а не дали некој е способен или не е способен“,
рече Битиќи.