Претседателот на Собранието Талат Џафери рече дека седницата на која останаа да се разгледаат уште четири точки треба да продолжи во вторник, но дали тоа ќе се случи зависи од работата на пратениците во комисиите
Ниту половина час не траеше денешната пленарна седница во Собранието затоа што немаше за што да се дискутира. Станува збор за 86. седница на чиј дневен ред се пет точки, но од нив за првите четири сè уште не завршила расправата во матичните комисии за да може за истите да се расправа и гласа и на пленарна седница.
Меѓу точките кои сè уште не го поминале филтерот во комисијата се и предлозите за продолжување на кризната состојба во цела држава заради недостиг на електрична енергија и состојбите на пазарите, како и во Градот Скопје заради недостиг на топлинска енергија.
Овие два предлози пред да бидат изгласани на пленарна седница прво треба да поминат во Законодавно-правната комисија и во Комисијата за одбрана и безбедност.
Власта и опозицијата, пак, излегоа со меѓусебни обвинувања. Координаторот на пратеничката група на ВМРО-ДПМНЕ, Никола Мицевски, упати критики во врска со работата на комисиите, нагласувајќи дека тие реагирале уште пред неколку месеци за сегашната ситуација и оти веќе се доцни со она што досега требало да биде сработено. Тој посочи дека кризните состојби ќе бидат изгласани, но оти до гласањето власта ќе мора да одговори на многу прашања во врска со состојбата.
Координаторот на пратеничката група на СДСМ, Јован Митрески, пак, ја обвини опозицијата дека намерно ја одолговлекува работата на комисиите. Тој рече дека никогаш порано немало ваква ситуација во Комисијата за одбрана да има толку долги дискусии посебно за вакви тешки прашања.
„Сакам да има дискусии со аргументи, но очигледно таму има чиста злоупотреба само да се одолговлечи времето за дискусија“,
нагласи Митрески додавајќи дека СДСМ е подготвен да дискутира и за информации да се формира анкетна комисија за да се види што се случува сега и што се случувало во минатото во енергетскиот сектор, да се отворат сите прашања кои се битни за граѓаните.
Со оглед дека четири од вкупно петте точки на дневен ред не се поминати во матичните комисии, на пленарната седница пратениците ја разгледаа само петтата точка: Барање за давање на автентично толкување на член 6 ставови (2) и (5) од Законот за задолжување на Република Северна Македонија со заем кај Меѓународната банка за обнова и развој – Светска Банка по Договорот за заем за финансирање на проектот за поврзување на локални патишта.
За оваа точка немаше пријавени за збор, па веднаш се гласаше. Од 109 присутни, 61 пратеник гласаа „за“, а немаше ниту еден „против“ или „воздржан“.
Претседателот на Собранието, Талат Џафери рече дека седницата на која останаа да се разгледаат уште четири точки, треба да продолжи во вторник, но дали тоа ќе се случи зависи од работата на пратениците во комисиите.