Пратеници на ВМРО-ДПМНЕ со маици со Гоце Делчев дојдоа на седница, СДСМ ги обвини дека го валкаат неговото дело

Од СДСМ порачуваат дека нема да учествуваа во дневнополитичкиот театар на ВМРО-ДПМНЕ чија цел е, како што велат, да им помогнат на оние центри што не сакаат Северна Македонија да ги почне преговорите со ЕУ

Дел од пратениците на ВМРО-ДПМНЕ денеска со маици со ликот на Гоце Делчев се појавиле на седница на Комисијата за надворешна политика и побарале да се разгледува декларацијата што ја поднесе опозициската партија.

Но, нивните колеги од СДСМ и ДУИ избегале, според претседателот на Комисијата, Антонијо Милошоски од ВМРО-ДПМНЕ.

„Денес на Комисијата за надворешна политика, пратениците од ВМРО-ДПМНЕ и коалицијата предложија да се разгледува декларацијата за великанот Гоце Делчев, но за жал присутните колеги од СДСМ/ДУИ побегнаа, за седницата да нема кворум и да не може да се гласа. Ќе ги почекаме, има време до Илинден“,

вели Милошоски, кој објави и фотографија со пратениците од коалицијата.

Од СДСМ, пак, испратија соопштение во кое ја обвинија ВМРО-ДПМНЕ дека го валка делото на великанот Делчев.

„Игрите и подметнувањата на ВМРО-ДПМНЕ се на штета на ликот и делото на великанот Делчев. Македонскиот национален херој Гоце Делчев не заслужил да го сведеме на политичка декларација! Подметнувањата на ВМРО-ДПМНЕ очигледно имаат цели да отворат поделби меѓу македонскиот народ. Нема да дозволиме да се понижува делото на великанот Делчев, ниту да држат лекции оние кои со многубројни потези го срамат неговиот лик, кои ги слават и величат Ќосето, Михајлов, Александров“,

велат од СДСМ.

Од партијата порачуваат дека нема да учествуваа во дневнополитичкиот театар на ВМРО-ДПМНЕ чија цел е, како што велат, да им помогнат на оние центри што не сакаат Северна Македонија да ги почне преговорите со ЕУ.

За СДСМ барањето за декларација за Гоце Делчев е популизам, ВМРО-ДПМНЕ смета дека тоа се црвените линии во преговорите со Софија

Во Собранието денеска беше напнато и во Комисијата за политички систем, каде што пратениците од ВМРО-ДПМНЕ, собирајќи се околу претседателката на ова тело, Соња Мираковска од НСДП, не дозволија да почне расправата за предлог-законот за академија за судии и јавни обвинители.

ВМРО-ДПМНЕ бараше да се повлече законот со кој, според нив, се прекршуваат процедурите и се злоупотребува европското знаменце. Обвинија за партизација на судството и носење законски решенија на сила, по што седницата беше прекината.

Новото мнозинството нема мнозинство во една третина од собраниските комисии, опозицијата, според СДСМ, користи можност да блокира