Мицевски посочи дека договорот кој го потпишал Заев со Бугарија „ни отворил проблеми кои досега сме ги немале“
Декларацијата за Гоце Делчев е непотребен популистички и погрешен потег, затоа што ние имаме Резолуција донесена со консензус во Собранието и која има обврзувачко дејство врз Владата во водењето на преговорите, истакна членот на Извршен одбор на СДСМ, Андреј Петров во гостување во емисијата „Топ Тема“ на телевизија Телма.
„Ние не можеме еден од темелите на државата Гоце Делчев, за кого никој во државата нема сомнеж дека е македонски херој да го сведеме на популизам. Утре може некој ќе побара да правиме декларација за Јане Сандански или Ѓорче Петров. Имаме Резолуција која има обврзувачки карактер, која ги дава рамките за натамошни преговори, каде што Собранието застанало зад таа Резолуција и сега треба да се остави на оние кои се задолжени за процедурата, таа да ја спроведуваат“
посочи Петров.
Од друга страна, пратеникот од ВМРО-ДПМНЕ, Никола Мицевски, во емисијата „Објектив“ на МТВ, истакна дека декларацијата е со цел да ги претставува црвените линии, покрај Резолуцијата изгласана во Собранието.
„Декларацијата за Гоце Делчев е поднесена со намера да биде поддржана и тоа да бидат црвените линии покрај Резолуцијата која ја изгласавме во Собранието. Поучени од минатото сметаме дека треба и околу ова прашање да имаме заеднички став по однос на отворените преговори со Софија да не се оди надвор од тие црвени линии“,
изјави Мицевски.
Тој посочи дека ВМРО-ДПМНЕ бара поддршка за во Собранието да се изгради став за најголемиот македонски деец врз кој се врзува историјата и тоа да биде одредување на крајните линии и граници.
Мицевски посочи дека договорот кој го потпиша Заев со Бугарија ни отвори „проблеми кои досега сме ги немале“.
Договорот кој Заев го потпиша за кој кажавме дека има одреден број на проблеми. Со неколку потчукнувања на грбот од страна на Борисов се потпиша тој Договор за добрососедство и тој договор почна да продуцира проблеми. Ако власта вели дека никој не го чепка македонскиот идентитет, еве шанса да го заштитиме“,
рече Мицевски, прашувајќи ја владејачката СДСМ зошто се плаши да ја поддржи декларацијата.