Шефот на дипломатијата вели дека предлогот што го поднесе опозицијата во парламентот нè враќа назад во процесот со Софија за деблокада на евроинтеграцијата на земјава
Декларацијата за Гоце Делчев што ја поднесе ВМРО-ДПМНЕ во Собранието нè враќа назад во процесот на преговори со Бугарија за надминување на разликите и деблокадата на евроинтеграцијата на земјата, оценува министерот за надворешни работи Бујар Османи.
„Слична ваква иницијатива имаше ВМРО на Каракачанов во бугарското собрание по однос на Свети Кирил и Методиј. Сакаа парламентот да ги дефинира историските прашања. Е сега, тоа што имаат исти имиња партиите, не мора да имаат и исти ставови. Ако влеземе во таков натпревар, ние денеска Гоце Делчев, утре бугарското собрание уште посилен текст за Гоце Делчев, па ние потоа, влегуваме во маѓепсан круг на односи, не само со Бугарија туку и генерално внатре во државата. Така што мислам дека не треба историјата да ја користиме како платформа за градење на нашите политички кариери, за дневно политичките прашања и препукувања. Ова се прашања за коишто е многу важно натпартиско единство за да се и заштитат некои важни прашања за граѓаните и државата, но, пред се, тоа да не стане тема за дневно политичко препукување“,
рече Османи во утринското гостување на Канал 5.
Во рамки на договорените активности на работните групи формирани на заедничката меѓувладина седница во Софија на 25 јануари, неделава, на 10 или 11 февруари, двете министерства за надворешни работи, на Северна Македонија и на Бугарија, во бугарската престолнина, ќе ги продолжат разговорите на експертско ниво за политичкиот пакет прашања во обид за надминување на разликите. На 10 февруари ќе се одржи и состанок на Работната група за инфраструктура, а првиот лет на релацијата Софија-Скопје треба да се реализира на 11 месецов.