Координаторот Јован Митревски вели дека опозицијата спинува со наводни кандидати за уставни судии и ја кочи работата на целиот парламент, можеби, според него, и со намера да предизвика инциденти
Во речиси една третина од собраниските комисии мнозинството не соодветствува со новиот распоред на сили во парламентот откако Беса (сега со двајца пратеници) замина во опозиција, а Алтернатива (со четворица пратеници) влезе во владејачката коалиција.
Во Собранието има 22 постојани работни тела, а координаторот на пратеничката група на СДСМ, Јован Митровски, вели дека новото мнозинство во парламентот не се пресликува во седум од комисиите. Тоа, според него, е причината поради која и Комисијата за избори и именувања не може да предложи кандидати за уставни судии.
„Не станува збор само за изборот на уставни судии, иако тоа што не можат да се изберат четворица од вкупно девет члена на Судот е сериозен проблем. Станува збор за една состојба во Собранието, така што новото парламентарно мнозинство не е пресликано во дел од комисиите. Сега имаме ситуација да има седум комисии, меѓу кои е Комисијата за избори и именувања, за одбрана, за локална самоуправа каде што мнозинството не соодветствува на новото мнозинство во Собранието. Практично, таму Беса го прави мнозинството, иако е во опозиција. Ова што се случува последниве недели е практично блокирање на Собранието. Се надевам дека во наредниот период, низ разговори, ќе излеземе од оваа ситуација и дека ќе имаме и предлози за уставни судии и затворање на други прашања, какви што има повеќе во Комисијата за избори и именувања“,
изјави Митровски во „Утрински брифинг“.
Според Митревски, опозицијата спинува со имиња кои наводно се кандидати за уставни судии, за да создаде перцепција за партизирање на Судот. Тој вели дека сè уште нема конкретни предлози за нови уставни судии.
„Спомнувањето нечии имиња е чист спин, за да се создаде некаков впечаток дека се партизира Уставниот суд, дека наводно ние ќе го продолжиме тоа што тие го правеа во минатото. Кандидатите за уставни судии се предлагаат на седница на Комисијата за избори и именувања. Немаме сè уште кандидати. Секако дека како членови на комисијата имаме свои размислувања, но на крај ќе ги синтетизираме тие размислувања и ќе излеземе со предлози“,
рече Митревски.
Тој оцени дека блокадите на опозицијата се одразуваат и на донесувањето суштински закони, за што како пример го посочи законот за наставници и стручни соработници во основното и во средното образование.
„Сме поминале над 900 точки во изминатиот период, ама има 30-40 закони кои се суштински, а ВМРО-ДПМНЕ ги блокира. Сега најавуваат амандмани за скалесто покачување на платите по зголемување на минималната плата, а од април минатата година го блокираат законот со кој се предвидува коефициентот на плата на наставниот кадар (околу 4 700 наставници) да се коригира согласно порастот на минималната плата во државата. Да не го блокираа тој закон, наставниците уште пред десетина месеци ќе имаа повисоки плати“,
рече Митревски.
Митревски посочи на две можни причини поради кои опозицијата ја кочи работата на законодавниот дом:
„Прво мислам дека преку блокадите сакаат да создадат некаков впечаток за нефункционалност во работата на Владата и на Собранието. Друга логика за ваквото функционирање на опозицијата може да е нејзина желба да предизвика инциденти во парламентот. Ние, сепак, им даваме се уште можност на разговорите и се надеваме дека во наредниот период ќе се разреши ситуацијата и ќе има и кандидати за уставни судии. Има и други начини на кои може да го направиме, меѓутоа внимаваме да не го предизвикаме тоа што го очекува опозицијата“,
вели Митревски.
Тој посочи и на Комисијата за надворешни работи, за каде што рече дека има чиста злоупотреба на положбата на опозицијата која раководи со ова тело, каде што не се закажуваат седници за да се блокира пополнувањето на амбасадорските места.