Сите докази укажуваат дека Сашо Мијалков бил во Скопје, а тоа што го направи власта го принуди да се пријави, рече премиерот Зоран Заев на пратеничко прашање од Александар Николовски од ВМРО-ДПМНЕ околу случувањата со ексдиректорот на УБК.
„Не е одговорно да се тврди дека Мијалков бил надвор и да се поставува прашање кога излегол, кога влегол, каде бил, ова е неодговорно. Сите докази што се запленети во цела постапка покажуваат дека неделата излегува од ‘Мериот’, половина час е околу ‘Мериот’ со женско лице и уште тројца, попладне оди кон ‘Тодор Александров’ 69, каде што му е едно од живеалиштата, до доставување на налогот бега од својот дом, веројатно во соседни објекти, соседно маало, но е тука. И тоа е јасно. И сега дали тврдењето два дена дека има договор дека власта го пушти, дека Заев се договорил, дека организирано е бегството од владејачката коалиција, испадна дека не е така. Еве го Мијалков е во домашен притвор, после 40 часа и каде е одговорноста на опозицијата за овие тврдења? Реков ќе има одговорност ако не го најдеме, каде е одговорноста на опозицијата за нејзините тврдења за тајни договори? Правосудството успеа да го финишира и овој процес. Ви беше страв да му го кажете името и презимето на Мијалков, додека не почнаа да пукаат бомбите. Ви беа милички функциите. И сега, ај што токму тие ве поставиле, ај што излажавте, на крајот требало власта да понесе одговорност, а опозицијата што?“,
рече премиерот.
Додека Заев зборуваше, пратениците од ВМРО-ДПМНЕ довикуваа да каже каде бил Мијалков, на што тој реплицираше:
„Кај беше Мијалков, тоа вие треба да ми кажете. Сѐ си мислам во белата палата беше. Зошто да не, слушам до ден-денес за него се чуваат простории, и за него и за Груевски. Дефинитивно, тоа што го направи власта го принуди да се пријави“,
рече Заев.
На ова Николовски рече дека Мијалков можеби се криел во Владата или во штабот на СДСМ за полицијата да не може да го најде.
„Ако се обидувате да го прикажете вашиот пораз како победа, тоа не завршува добро“,
рече Николоски.