Ако ексдиректорот на УБК, Сашо Мијалков, не ја напуштил државата, како што тврди Владата, тогаш логично прашање е каде бил во време кога го бараше полицијата? Дали е лоцирана куќата или во станот и зошто не е извршен претрес, праша денеска од собраниската говорница пратеникот од ВМРО-ДПМНЕ, Александар Николовски.
„Заев самиот кажа дека ја координирал акцијата за обезбедување на бегалецот од правдата, а тој вели дека бил во изолација, па самиот се пријавил. Имам една дилема – според Владата, тој бил во Скопје, а според наши информации ја напуштил државата на север и се вратил. Ако ја прифатиме логиката на државата дека бил во Скопје, логично прашање е каде бил во Скопје, ако не бил пронајден во неговиот дом. Прашање е каде бил доколку бил во Скопје, дали е лоцирана куќата или станот каде што бил и, ако е лоциран, зошто не е извршен претрес? Доколку не бил во Скопје, а мислам дека не бил, логично прашање е како се врати во државата, имајќи предвид дека нелегално ја напуштил, значи и нелегално се вратил“,
праша Николовски.