За гаснење на пожарот, додаваат од ЦУК, биле испратени две противпожарни возила и четири пожарникари, како и шест вработени од подружницата „Јабланица“ на Јавното претпријатие „Национални шуми“
Хеликоптер „бел 412“ на Министерството за внатрешни работи е ангажиран за гаснење на пожар во атарот на селото Делогожди во Општина Струга, информираат од Центарот за управување со кризи (ЦУК).
Пожарот, кој прво избувнал на депонија, се проширил и ја зафатил и блиската борова шума.
За гаснење на пожарот, додаваат од ЦУК, биле испратени две противпожарни возила и четири пожарникари, како и шест вработени од подружницата „Јабланица“ на Јавното претпријатие „Национални шуми“.
Од ЦУК велат дека поради постоење опасност од проширување на пожарот кон место што е непристапно за гаснење од земја, била побарана воздухопловна поддршка од хеликоптерската единица на МВР.
Командирот на Територијалната противпожарна единица од Струга, Фети Мазари, за МИА вели дека во пожарот е зафатена голема површина дабова шума и багрем, а постои опасност од префрлање на огнот од другата страна кон Поум, доколку не се интервенира од воздух.
Тој додава дека истото место било зафатено од пожар и пред две години, при што била изгорена голема површина багрем, дабова и борова шума.