На прашањето: „Сте слушнале ли за бројот 112?“, 37,4 отсто од испитаниците одговориле дека го знаат, а дури 62,6 отсто дека не го знаат овој број
Бројот 112, како број за итни случаи при соочување со опасност, го препознаваат 17,3 отсто од испитаниците. Најголем дел од испитаниците или 58 отсто кога ќе наидат на опасност најпрво би се јавиле во полиција на 192, а 18,3 отсто не знаат каде треба да се јават.
Ова го покажуваат резултатите од анкета спроведена за потребите на Центарот за управување со кризи (ЦУК) која била направена со цел да се провери свесноста и познавањето на граѓаните за единствениот европски број за итни случаи 112 и улогата на ЦУК.
Резултатите денеска ги презентираше директорот на Центарот, Стојанче Ангелов, кој рече дека на граѓаните добро им се познати броевите за итни случаи.
Најголема свесност постои за бројот 192, односно за полиција – овој број го знаат 72,1 отсто од испитаниците. Најмала свесност, пак, има за бројот 193 или 56,9 отсто од испитаниците знаат кој е бројот на противпожарната бригада.
Меѓутоа, на прашање за единствениот број кој е активен една и пол година, резултатите покажуваат дека мнозинството граѓани не слушнале за него.
Прашањето во анкетата гласело: „Сте слушнале ли за бројот 112?“, а 37,4 отсто одговориле дека го знаат, а дури 62,6 отсто дека не го знаат овој број.
„Ова нè наведува на заклучокот дека треба да работиме на популаризација на бројот 112. Притоа упатуваме молба до сите медиуми, да го популаризираат бројот 112, на тој начин да им помогнат на граѓаните“,
потенцира Ангелов.
За таа цел, директорот на ЦУК рече дека во согласност со политиката на Владата и доколку се создадат услови ќе се обидат да издејствуваат и платена кампања со цел да се запознае јавноста преку медиумите.
Што се однесува, пак, на ЦУК, анкетата покажува дека поголем дел или 73,5 отсто од испитаниците слушнале за оваа институција при што половина од испитаниците или 54,8 отсто точно ја препознаваат како институција која ја координира соработката меѓу одделните институции. Останатата половина го препознава ЦУК по активностите, односно настаните кои ги има координирано. Испитаниците најмногу се сеќаваат на пожарите во Источна Македонија – 51,9 отсто и случајот со мостот „Беласица“ – 26,6 отсто.
Позитивен став за работата на ЦУК имаат 28,5 отсто од испитаниците, негативен – 15,4 отсто, 22,2 отсто не знаат или не можат да оценат, а 33,8 отсто се со неутрален став. Позитивен став за работата на директорот на ЦУК, пак, имаат 30,1 отсто, негативен став – 19,4 отсто, 26 отсто не знаат или не можат да оценат, 24,5 отсто се неутрални.
Анкетата чии резултати денеска ги презентираше Ангелов, била спроведена од 29 мај до 2 јуни 2023 година на репрезентативен примерок од 1 067 испитаници од страна на агенцијата „Маркет висион“.