Координаторот на ПГ на Алијанса/Алтернатива побара предлог-измените на Законот за попис да се тргнат од дневен ред и апелираше до ДУИ да се спротивстави на одложување на пописот, за, како што рече, да не се дозволи ситуација како во 2011 година
Дури 95 пратеници гласаа за потребата за измени на Законот за попис по скратена постапка, на седницата што ја закажа денеска спикерот Талат Џафери. „Против“ беа само седум пратеници, веројатно од Алијансата за Албанците и Алтернатива, додека ривалските СДСМ и ВМРО-ДПМНЕ овој пат здружено гласаа „за“.
Со тоа почна постапката за измена на Законот, за да се обезбеди одложување на пописот за септември, наместо првичното решение кое предвидуваше теренскиот дел од операцијата да почне денес и да трае до 21 овој месец.
Сега за законот треба да расправаат Законодавно-правната и Комисијата за европски прашања, со оглед на тоа што законот е со европско знаме. Комисиската расправа за овој закон може да трае максимум два дена, кога може да се поднесуваат и амандмани, што не е исклучено ако се има предвид праксата на опозициските Алијанса и Алтернатива за амандмански блокади.
Координаторот на пратеничката група на Алијанса/Алтернатива, Скендер Реџепи, побара предлог-измените на Законот за попис да се тргнат од дневен ред, затоа што, како што рече, не е консултирана ниту Комисијата за заразни болести, иако образложението е дека пописот се одложува поради ситуацијата со ковид-19. Тој апелираше до владејачката ДУИ да се спротивстави на одложување на пописот, за, како што рече, да не се дозволи ситуација како во 2011 година.
Со огромно мнозинство, пратениците ја усвоија и потребата за донесување по скратена постапка на измените на Изборниот законик, со кои се уредува постапката за скенерите за отпечатоци од прст, но и се предвидува одложување на локалните избори за втората половина на октомври, за кампањата да почне откако ќе заврши пописот во септември.
Дневниот ред на денешната седница, на кој се само овие две точки што произлегоа од средбата меѓу премиерот Зоран Заев и лидерот на ВМРО-ДПМНЕ Христијан Мицкоски, беше усвоен со 94 гласа „за“ и без „против“ или „воздржани“.