Рокот за аплицирање на јавниот повик за финансиска поддршка за зајакнување на конкурентноста на компаниите што инвестирале за време на пандемијата со коронавирусот истекува денеска.
Со повикот, кој е дел од третиот сет економски мерки за поддршка на економијата од последиците предизвикани од пандемијата, државата предвидува финансиска поддршка од вкупно 20 милиони евра за сите компании кои годинава и покрај пандемијата и економската криза продолжија да работат и да инвестираат во раст и развој на својот бизнис.
Јавниот повик беше објавен на веб-страницата на Министерството за економија на 12 јуни 2020 година и досега се пристигнати над 300 барања од компании.
Во меѓувреме, во јавноста бура од реакции предизвика злоупотребата на државната помош од стотици фирми кои зеле субвенции за исплата на плати за вработените, но не им ги исплатиле.
Владата вчера јавно ги објави имињата на фирмите и најави дека ќе бара Обвинителството да спроведе постапка за утврдување кривична одговорност кај одговорните лица во фирмите.