Новиот патријарх на Српската православна црква (СПЦ), Порфириј, во интервју за РТС рече дека за него е суштински важно да се надмине расколот со Македонската православна црква (МПЦ) и решението да биде согласно каноните и без мешање на политиката.
Прашан за изјавата на митрополитот преспанско-пелагониски Петар дадена неодамна за МИА дека очекува новиот српски патријарх да покаже повеќе разбирање за да биде решен статусот и МПЦ-ОА да добие автокефалност, Порфириј одговори дека нема да има ни помалку ни повеќе разбирање од неговите претходници, цитирајќи латинска поговорка: „нема да биде ново нешто, но може да биде нов начин“.
„Секој од нас остава свој сопствен печат. Секако дека суштински ми е важно да се надмине расколот со Македонската црква. Нашата црква по Нишкиот договор најде решение за охридски архиепископ да го постави Јован, и сите православни верници имаат можност за учество во литургиски живот, но таа тема останува отворена. Верувам дека нашиот собор секогаш ќе биде спремен да се дојде до решение кое ќе биде во согласност со каноните, без какви било политички притисоци кои уште од самиот почеток на расколот, а и денес за тоа прашање ги има“,
рече патријархот Порфириј.
Порфириј беше избран за патријарх на СПЦ на 18 февруари, а дојде на место на Иринеј кој почина како последица од ковид-19.