Ажурираниот предлог на ЕУ, кој двете страни го добија пред почетокот на самитот ЕУ–Западен Балкан во Тирана минатиот декември, а кој сè уште не е официјално објавен, вклучува меѓусебно признавање на официјалните документи, зголемена финансиска помош и други мерки за подобрување на животот на луѓето во двете земји
Косовскиот премиер Албин Курти во интервју пред новата рунда преговори во Брисел изјави дека до крајот на годината може да се постигне договор меѓу Србија и Косово, а централниот дел од нормализацијата на односите треба да биде меѓусебното признавање.
Косово и Србија имаат цел да склучат значаен договор за нормализација на односите оваа година, изјави Курти во ексклузивното интервју за порталот „Еуроактив“во пресрет на денешните преговори во Брисел, но нагласи дека нема да биде лесно и покрај зголемениот ангажман на Западот.
Курти: Целта е да го добиеме договорот оваа година
„Потребна ни е нормализација на односите, а тоа може да се постигне со заемно признавање како централен дел (на нормализацијата)“,
рече Курти.
Тој како клучен проблем ја наведе упорноста на Белград во формално непризнавање на независноста на Косово, иако може да се согласи на де факто признавање.
Коментарите на Курти дојдоа во пресрет на средбата на високо ниво организирана од високи европски претставници, на која се очекува лидерите на Србија и Косово да поддржат договор за нормализација на заладените односи, пишува порталот „Еуроактив“.
Ажурираниот предлог на ЕУ, кој двете страни го добија пред почетокот на самитот ЕУ–Западен Балкан во Тирана минатиот декември, а кој сè уште не е официјално објавен, вклучува меѓусебно признавање на официјалните документи, зголемена финансиска помош и други мерки за подобрување на животот на луѓето во двете земји.
Запрашан за коментар околу изгледите за постигнување договор до крајот на оваа година, според посочената временска рамка, Курти рече:
„Секако дека целта е да се добие овој договор оваа година“.
Вучиќ: Нема да има капитулација
Во пресрет на средбата во Брисел зборуваше и српскиот претседател Александар Вучиќ. Тој изјави дека на денешната средба во Брисел, како дел од дијалогот меѓу Белград и Приштина, ќе го направи она што е најдобро за Србија.
„Ниту ќе има капитулација ниту ќе има враќање во деведесеттите. Србија ќе оди напред колку и да е тешко и ќе успееме да се избориме за тоа“,
порача Вучиќ во обраќањето на Инстаграм.
Тој им се заблагодари на оние што го поддржуваат раководството на Србија, и на оние „што однапред се подготвуваат да нè нападнат додека потпишуваме нешто затоа што на тој начин ќе бидеме предавници и тие однапред знаат дека ние сме виновни и дека се враќаме во деведесеттите“.
„Можам само да кажам дека не треба да се грижат“,
рече Вучиќ.
Хил: Не очекувам брзи резултати
Американскиот амбасадор во Србија, Кристофер Хил, во пресрет на средбата меѓу српскиот претседател Александар Вучиќ и косовскиот премиер Албин Курти во Брисел, за српските медиуми во Крагуевац изјави дека нема илузии дека може да дојде до брзи резултати.
Хил воедно рече дека средбата меѓу двајцата лидери во Брисел покажува дека Европската Унија (ЕУ) се обидува да најде решение што ќе им одговара на сите во иднина.
„Процесот во Брисел секако не може да ги задоволи оние што веднаш очекуваат задоволителен исход“,
рече Хил.