Судењето за случајот „Рекет“ продолжува на 24 април, откако денешното рочиште беше одложено поради состојбата со коронавирусот во затворот „Скопје“ во Шуто Оризари, каде што е притворен Бојан Јовановски-Боки 13.
Од Основниот кривичен суд во Скопје велат дека имало известување обвинетиот да не се спроведува за денешното рочиште.
Случајот се наоѓа во фаза на дополнение на доказна постапка, а на денешното рочиште, според адвокатот Дељо Кадиев, требало да се презентираат вештачења на обвинителството.
„Денешното рочиште се одложи поради состојбата со коронавирусот во затворот Шутка и треба да продолжи на 24 април. Во фаза сме на изведување на докази од ЈО – вештачења за кои треба да се потврди дали тие вешти лица имаат лиценци и да се пристапи кон изведување на тие вештачења“,
вели Кадиев кој е еден од двајцата бранители на Катица Јанева.
Претходно, на неколку рочишта се сослушуваа сведоците на обвинетата Катица Јанева, меѓу кои беа повеќето од обвинители кои работеа во СЈО. Но, бидејќи во исказите се поставувале прашања за предмети кои се во предистрага и истрага, тие беа затворени за јавноста.
Во Шутка, каде што е сместен Јовановски, се земаат брисеви за тестирање на притворениците откако кај еден притвореник беше утврден вирусот ковид-19. Тој починал од срцев удар, а постхумно му се земени брисеви, кои биле со позитивен резултат.
*Поврзани вести:
Притвореник во Шутка, кој починал од срцев удар, бил позитивен на коронавирусот
„Тетова сот“: Притвореници во Шутка фрлале чинии од прозорци
Управа за извршување санкции: Ситуацијата во Шутка е редовна и под контрола