Полска, која е членка на НАТО и силен поддржувач на Украина, дели граница и со руската ексклава Калинингард и со сојузникот на Москва, Белорусија, каде што Русија лани распореди тактичко нуклеарно оружје
Полска е подготвена да прифати на своја територија да биде распоредено нуклеарно оружје, доколку НАТО се одлучи на такво нешто, по потезите што Русија веќе ги направи за засилување на своето вооружување во Белорусија и Калининград, вели полскиот претседател Анджеј Дуда во интервју објавено денеска, пренесува британски „Гардијан“.
Полска, која е членка на НАТО и силен поддржувач на Украина, дели граница и со руската ексклава Калинингард и со сојузникот на Москва, Белорусија.
Ексклавата Калининград остана физички отсечена од Москва откако Литванија стана независна држава по распадот на Советскиот Сојуз во 1991 година.
„Доколку нашите сојузници решат да распоредат нуклеарно оружје на наша територија како дел од нуклеарното споделување, за да го зајакнат источното крило на НАТО, ние сме подготвени да го сториме тоа“,
рекол Дуда во интервјуто објавено од весникот „Факт“.
Интервјуто на Дуда за полскиот медиум, како што забележува „Гардијан“, доаѓа по неговата посета на Њујорк, каде што имаше состаноци во Обединетите нации и разговараше за војната во Украина со поранешниот американски претседател Доналд Трамп, кој се надева на втор мандат на претседателските избори оваа година, како кандидат на републиканците.
Претседателот на Полска минатиот месец беше во посета на Вашингтон, каде што се сретна со американскиот претседател Џо Бајден.
Дуда, како што пренесува „Гардијан“, изјавил дека дискусиите за нуклеарна соработка меѓу Полска и САД се одвиваат веќе извесно време.
„Веќе зборував за ова во неколку наврати. Морам да признам дека кога ме прашаа за тоа, изјавив дека сме подготвени…Русија се повеќе го милитаризира Калининград. Неодамна почна со пренесување на своето нуклеарно оружје во Белорусија“,
изјавил Дуда.
Во јуни лани рускиот претседател Владимир Путин потврди дека Москва испратила тактичко нуклеарно оружје во Белорусија, која граничи со Украина и Полска.
Опасноста Путин да употреби тактичко нуклеарно оружје во војната со Украина, американскиот претседател Бајден тогаш ја оцени како реална.
Претседателите на Литванија, Полска и Летонија во јули лани преку писмо до генералниот секретар на НАТО, Јенс Столтенберг, предупредија на заканата од агресивните активности на Русија и развојот на ситуацијата во Белорусија.