Српските медиуми денеска како главна вест ја соопштија одлуката на македонската влада за ослободувањето од плаќање патарина за српските туристи за време на летниот период, а „Политика“ објави текст за т.н. медицински туризам на српските државјани, кои прават ПЦР-тестови во Северна Македонија, па продолжуваат на одмор во Грција.
„Овие денови социјалните мрежи се преполни со огласи за сместување и поевтино тестирање во Северна Македонија, каде што веќе се има сериозно развиено медицинскиот туризам, а акредитираните лаборатории се натпреваруваат која ќе понуди поповолна цена за ПЦР и останатите тестови“,
пишува „Политика“.
Цената на ПЦР-тестот во Србија е 76 евра, во С Македонија тој за едно лице чини 35 евра, за две со попуст изнесува 30 евра, а постои и услуга ВИП-тест кој чини 70 евра со добивање резултат за помалку од еден час, наведува „Политика“ и додава дека брзиот антигенски тест чини 16, а за антитела 20 евра по лице.
„Туристите од Србија кои деновиве патуваа за Грција велат дека многумина отседнуваат една ноќ во Македонија за да ја соберат потребната документација, а на интернет се наоѓаат и огласи на хотели кои нудат тестирање без одење во лабораторија. Еден од нив од Гевгелија нуди услуга ноќевање и тестирање за 40 евра“,
пишува медиумот.
Вчера на владина седница беше одлучено српските туристи да се ослободат од плаќање патарини, во знак на благодарност за донираните вакцини од Белград. Според владината одлука, Министерството за финансии треба да префрли средства во износ од 172 милиони денари за набавка на 200 000 картички на сметката на Владата, а ЈП за државни патишта да изврши сукцесивна испорака на предвидените количини.