Спикерот Талат Џафери денеска ја свика и претседаваше со Првата пленарна седница за унапредување на родовата еднаквост на која се разгледуваше Информацијата за напредокот за родовите прашања во последните две децении во Република Северна Македонија
Жените ширум светот денеска, на Меѓународниот ден на жената, масовно протестираат за да ги одбранат своите права кои се загрозени во се повеќе земји. Пораки по повод 8 Март, Меѓународниот ден на жената, преку социјалните мрежи, упатија дел од политичарите. Некои со честитки, а некои со рози порачаа дека ќе прават повеќе за еднаквите можности на жените и мажите.
Претседателот Стево Пендаровски со порака „Борбата за еднаквост не смее да запре“, на својот официјален фејсбук-профил напиша дека секоја жена има право на слободен избор за своето тело, семејство, образование, занимање, работа, кариера, развој, политичко дејствување и учество во јавниот живот.
„Ниту едно општество не може да се развие доколку половина од населението е исклучено од тој развој. Мораме да се застапуваме за поголемо политичко учество на жените, поголем број на жени на раководни позиции, да носиме политики во кои ќе ги планираме потребите на жените, буџети кои ќе ја имаат родовата димензија. Да создаваме општествен амбиент што ќе овозможи повеќе жени да бидат вклучени, а не исклучени“,
напиша Пендаровски.
Тој порача дека жртвите на родово-базирано насилство мора да добијат правда.
„Доколку сакаме да изградиме модерно, отворено и демократско општество потребно е да направиме повеќе за еднаквите можности на жените и мажите, а нерамноправноста, дискриминацијата и шовинизмот да ги оставиме во минатото. Жртвите на родово-базирано насилство мора да добијат правда. Треба гласно и одлучно, и стратешки и тактички, да се бориме против родово-базираното насилство, за кое мора секогаш да има праведна разрешница“,
посочи шефот на државата по повод Денот на жената.
Премиерот Димитар Ковачевски во својата честитка нагласи дека жените заслужуваат признание за нивната храброст, упорност, достоинство и борбеност на сите фронтови.
„И тоа не само на овој ден, туку секој ден. Токму затоа, целосно и безрезервно ги поддржувам во напорите за препознаеност на нивната безвременска улога во општеството, каде, рамо до рамо, со мажите, остваруваат огромни успеси во различни сфери и со своите способности, вештини и квалитети ги бришат границите и препреките за наредните генерации“,
напиша Ковачевски на Фејсбук.
Претседателот на Собранието Талат Џафери од собраниската говорница упати порака до сите жени – да бидат гласни, храбри, бестрашни водилки во градењето на похумано, демократско и рамноправно општество, во кое важноста, вредноста и придонесот во семејството, општеството и државата е неприкосновена.
Тој денеска ја свика и претседаваше со Првата пленарна седница за унапредување на родовата еднаквост на која се разгледуваше Информацијата за напредокот за родовите прашања во последните две децении во Република Северна Македонија.
Лидерот на ВМРО-ДПМНЕ, Христијан Мицкоски, не пропушти и на овој ден да ѝ замери на Владата.
„Не е доволно само декларативна заложба за родова еднаквост, како што тоа го прави актуелната власт, тоа е потценување на интелигенцијата на жените, потребни се коренити промени, а тие доаѓаат најпрво преку градење на систем на добро владеење кој се темели на закони и правила, а не на криминал и криминални кланови кои го загрозуваат животот на граѓаните. Не е доволно власта да се залага за еднаквост, а жените, исто како и мажите, да тонат во сиромаштија заради тоа што власта е криминална и краде. Потребни се големи чекори напред. Потребна е вистинска заложба и искрени намери, не за политички поени, туку за подобра иднина на нашите деца“,
напиша меѓу другото Мицкоски во својата честитка по повод 8 Март.
Вицепремиерот за европски прашања Бојан Маричиќ порача дека „8 Март е ден кој нѐ потсетува на обврската да негуваме општество во кое жените се еднакви со мажите, се почитувани дома и на работа, се исто платени со мажите, се еднакво застапеност во јавниот и политичкиот живот и имаат сигурен пристап до правдата“.
Министерот за економија Крешник Бектеши порача дека 8 Март е Меѓународен ден на жената преку кој се одбележува борбата за политичка, економска и социјална рамноправност помеѓу жените и мажите.
„За да го испочитуваме овој меѓународен празник треба секојдневно да дејствуваме против родова стереотипизација. Чест ми е денеска да кажам што во Министерството за економија со кое што јас раководам, поголем дел односно 65 отсто од вкупниот број на вработени се жени“,
напиша Бектеши.
Министерот за образование Јетон Шаќири на вработените припаднички на понежниот пол во министерството им подели честитки со срце.
Дел од градоначалниците одлучија на овој ден да поделат рози. Градоначалникот на Аеродром Тимчо Муцунски, заедно со претседателот на советот Дејан Митески, се сретнаа со жените кои се дел од комуналните служби во Аеродром.
„Им се заблагодаривме за трудот и личниот придонес кој тие го даваат за сите да живееме во почиста и поубава општина. Нивната работа е од витално значење за средината во која живееме и ниту една наша цел поврзана со здравата и животна средина нема да биде остварлива без нивната поддршка“,
објави Муцунски на Фејсбук.
Црвени рози делеше и градоначалникот на Центар Горан Герасимовски. Тој на жените кои случајно ги сретна на улица им порача дека се столбови на семејствата, но истовремено и суштински дел од политичкиот, општествениот, економскиот и културниот живот во секое општество.
„Останете трудољубиви и борбени за вашата видливост и признавање на успесите, јас сум тука да ги поддржам вашите ставови“,
напиша Герасимовски на Фејсбук.
Кумановскиот градоначалник Максим Димитриевски, пак, се одлучи за бели рози кои им ги подели на жените во домот за стари лица „Зафир Сајто”.
Градоначалникот на Штип Иван Јорданов со симболичен гест, со мурал на ѕидот во паркот К’ртеке во чест на текстилните работнички, го одбележа Меѓународниот ден на жената.
„Овој мурал е гласот на текстилните работнички, кој бил првиот импулс на женската борба за рамноправност, кој направил ехо од кое сите мајки, девојки, работнички, докторки, продавачки, професорки, службенички, уметнички, земјоделки, спортиски, политичарки…денес се еманципирани индивидуи во нашата заедница“,
објави Јорданов на Фејсбук.