Британскиот весник „Дејли мирор“, кој го цитира Би-би-си, наведува дека најмалку еден член на персоналот на болницата во која се лекуваат членовите на кралското семејство, бил фатен при обидот да пристапи до приватните медицински досиеја на принцезата од Велс
Канцеларијата на британскиот комесар за информации ги испитува тврдењата дека персоналот на приватната лондонска клиника, чии услуги ги користат членовите на кралското семејство и каде што во јануари годинава беше оперирана принцезата од Велс, Кејт Мидлтон, се обидел да пристапи до нејзините приватни медицински досиеја.
Британскиот весник „Дејли мирор“, кој го цитира Би-би-си, наведува дека најмалку еден член на болничкиот персонал бил фатен при обидот да пристапи до приватните медицински досиеја на Кејт Мидлтон.
Весникот дополнително наведува дека е покрената и интерна истрага во приватната болница во Лондон во која во изминатите месеци се лекуваа принцезата од Велс и кралот Чарлс Трети.
Лондонската клиника, според „Дејли мирор“, одбила да ги коментира ваквите тврдења, но додала дека сите нејзини пациенти без разлика на нивниот статус заслужуваат целосна приватност и доверливост во поглед на нивните медицински информации. Според извори на медиумот, болницата ја известила Кенсингтонската палата за наводниот прекршок веднаш штом тој бил откриен. Портпаролот на Кенсингтонската палата, пак, одби да ги потврди или негира ваквите наводи додавајќи дека ова е прашање на клиниката во Лондон.
Во меѓувреме, портпаролот на Канцеларијата на британскиот комесар за информации потврди дека е добиен извештај за наводен прекршок и дека се испитуваат дадените информации.
Принцезата од Велс, Кејт Мидлтон, во јануари годинава беше хоспитализирана по направената на операција на абдоменот, по што се повлече од јавните обврски додека закрепнува.