Покрај САД и Германија, и Холандија најави дека ќе го испрати ракетниот систем „Патриот“ во Украина

Холандскиот премиер информира дека неговата земја одлучила да потроши дополнителни 2,5 милијарди евра за поддршка на Украина

Холандија ќе им се придружи на САД и Германија и ќе ѝ го испрати на Украина системот за противракетна одбрана „Патриот“. Ова на средба со американскиот претседател Џо Бајден вчера го истакнал премиерот на Холандија, Марк Руте кој е во посета на Вашингтон.

„Холандија ќе им се придружи на Соединетите Американски Држави и Германија во испраќањето на системот за противракетна одбрана ‘Патриот’ во Украина“,

рече Руте на состанокот во Белата куќа.

Руте информира дека Холандија одлучила да потроши дополнителни 2,5 милијарди евра за поддршка на Украина, што владата на земјата го објави претходно.

Бајден, пак, му заблагодари на Руте што е „многу цврст“ во поддршката на Украина.

Претходно овој месец, Германија се согласи да испорача на Киев 40 оклопни транспортери „Мардер“ и ракетна батерија за противвоздушна одбрана „Патриот“.

Соединетите Држави ветија еден систем „Патриот“ во декември минатата година како дел од еден од големите пакети за воена помош што ѝ ги доставија на Украина.

САД ќе обучуваат украински војници за ракување со „Патриот“

„Патриот“ е одбранбен систем земја-воздух кој се смета за еден од најнапредните системи за воздушна одбрана во американскиот арсенал.