Собраниската Комисија за транспорт, врски и екологија денеска не ја започна расправата по предлог-законот за легализација на дивоградби, иако беше на дневен ред на денешната нејзина седница. Од Комисијата информираат дека за овој предлог-закон, кој се предлага да се донесе во скратена постапка, се поднесени над 1.000 амандмани. Продолжението на седницата со оваа точка, како што информира претседателката на Комисијата Лилјана Затуровска, ќе биде дополнително закажано.
Предлог-законот предвидува легализација на дивоградби од значење за Републиката и од локално значење кои се предвидени со Законот за градење или друг закон, а кои претставуваат градежна и функционална целина заклучно со 1 октомври годинава.
За легализација на ваквите објекти се предвидува да се плаќаат 100 проценти комуналии за објектот, како и казна во износ од 50 проценти од комуналиите, додека за бесправните електронски комуникациски мрежи надоместот ќе изнесува 10 евра по квадратен метар од изградена површина.
Со законот ќе бидат опфатени бесправните објекти од јавен интерес утврден со закон чии иматели се државни органи или единици на локална самоуправа.
Предлог-законот не ги опфаќа сите видови бесправни објекти изградени во границите на Охридскиот Регион во кој се наоѓа природното и културното наследство запишано во списокот на Конвенцијата на УНЕСКО, во границите утврдени со Законот за управување со светското природно и културно наследство во Охридскиот Регион, како и станбените згради и нивните доградби и надградби.
За оние што поднеле барање според стариот закон ќе важат одредбите според кои за легализација се плаќа по едно евро за квадратен метар.
Со актуелниот Закон за легализација на дивоградби кој е во сила беа поднесени над 430 илјади барања за легализација, а во рокот што се продолжуваше во два наврата имаа право да аплицираат сопствениците на дивоградби изградени до 3 март 2011 година. Податоците на Катастарот покажуваат дека досега се спроведени решенија за легализација на 245.544 објекти.