Концертот ќе се одржи во училиштето каде што учел Делчев во Софија, а поканети се членови на националните собранија на Бугарија и Македонија, како и бугарската и македонската влада
По повод 153-годишнината од раѓањето на македонскиот револуционер Гоце Делчев, на 4 февруари, во училиштето каде што учел Делчев во Бугарија, денес Воена академија „Г.С.Раковски“ во Софија, ќе се одржи свечен концерт со класична музика и поезија.
Настанот го организира Меѓународната фондација за соработка и културен натпревар „Гоце Делчев“ од Бугарија, под покровителство на бугарскиот претседател Румен Радев.
На концертот, како што информираат од фондацијата „Гоце Делчев“, ќе учествуваат Илина Митревска – сопран од Македонија, Нели Динева – сопран од Бугарија, Валентина Божиновска – поезија од Македонија, Елисавета Шапкарева – поезија од Бугарија, Љупка Биаџони-Гутенберг – диригентка од Германија и Софискиот симфониски оркестар.
На концертот се поканети членови на националните собранија на Бугарија и Македонија, како и бугарската и македонската влада.