Партиите, Пендаровски, МНР и СЕП имаат рок до 10 април да испратат предлози за свои претставници во работната група
Министерството за правда наскоро се очекува да ја формира работната група за уставните измени со кои Бугарите и други заедници ќе се вметнат во Уставот.
Од ова Министерство, како што информираа денеска, побарале од политичките партии застапени во парламентот, но и од претседателот Стево Пендаровски, Министерството за надворешни работи (МНР) и Секретаријатот за европски прашања (СЕП) да номинираат свои претставници во работната група. Рокот што им го дале за да предложат експерти е до 10 април 2023 година.
„Во барањето за номинација е наведено дека во интерес на исполнување на нашата обврска која произлегува од преговарачката рамка која ја усвоиле 27 земји членки на ЕУ, потребно е политичко обединување со цел да се загарантира европската перспектива на нашата држава. За таа цел потребно е да се определи претставник кој има познавање од областа на Уставното право кој активно ќе учествува во работната група при изготвувањето на уставните измени“,
велат од Правда.
Од власта претходно порачаа дека се подготвени да ѝ отстапат на опозицијата да ги формулира уставните амандмани, како што таа мисли дека треба, во согласност со преговарачката рамка, а со цел да стекне доверба во процесот.
Меѓутоа, ваквата понуда во јавните настапи на претставници на ВМРО-ДПМНЕ беше одбиена со порака дека уставни измени во овој парламентарен состав ќе нема.
Лидерот на ВМРО-ДПМНЕ, Христијан Мицкоски, пак, изминатиот викенд рече дека партијата е спремна да поддржи уставни измени доколку тие бидат по моделот на хрватскиот устав, што всушност ќе значи промена на мултиетничкиот карактер на државата во унитарен.
Ова наиде на негодување кај албанскиот блок од политичките партии, од кои дел рекоа дека сепак е добро што ВМРО-ДПМНЕ размислува за уставни измени. Од СДСМ, пак, порачаа дека своите предлози партијата ќе може да ги даде и во рамки на работната група за која денеска Министерството за правда побара да се предложат експерти.
*ПОВРЗАНИ ВЕСТИ: