Ова, како што попладнево изјави гувернерот на Народната банка, Трајко Славески, е логистички многу поедноставно отколку снабдување со готовина на филијалите во овие градови. Превозот е организиран за корисниците кои немаат платежни картички
За да им излезе во пресрет на граѓаните од градовите во околината на Битола кои се корисници на Алта банка, а немаат платежни картички, Народната банка за утре организира автобуски превоз од Прилеп, Ресен и Охрид до филијалата на Алта банка во Битола, од каде што ќе може да си ги подигнат пензиите и социјалната помош.
Ова, како што попладнево на прес-конференција изјави гувернерот на Народната банка, Трајко Славески, е логистички многу поедноставно отколку снабдување со готовина на филијалите во овие градови.
„Утре, сабота, 7 ноември, ќе биде организиран превоз од Прилеп, Охрид и Ресен до Алта банка во Битола и назад. На овој начин на граѓаните ќе им се овозможи полесен пристап до средствата на своите сметки и подигнување готовина. Враќањето до местото на живеење ќе биде откако сите клиенти на банката ќе си ги подигнат средствата“,
соопштија од Народната банка.
Автобусот од Прилеп кон Битола ќе тргне во 10 часот од плоштадот „Методија Антонов-Ченто“ (пред „Реклами“), од Охрид ќе се трга во 11 часот од градската автобуска станица, а од Ресен во 12 часот од кај маркетот Кипер.
Покрај од филијалата во Битола, граѓаните кои немаат платежни картички, од понеделник (9 ноември), ќе може да подигнат готовина и од експозитурите на Алта банка во Тетово и во Струмица.