Мицковски се надева дека Владата во последен момент ќе каже „не“ на францускиот предлог
Во истото време, 19 часот, на истата локација, пред зградата на Владата и на овој десети ден почна протестот „Ултиматум – не, благодарам!“. Насобраните граѓани со знамиња, пароли и свирејќи се упатија по најавената маршута од пред Владата, покрај плоштадот Скендербег, покрај Министерството за надворешни работи до Собранието.
Пред почетокот на денешниот протест повторно се обрати лидерот на ВМРО-ДПМНЕ, Христија Мицковски, кој рече дека продолжуваат онаму каде што застанале.
„Рековме дека сето она кое што ќе се случува деновите кои што се пред нас во Парламентот преставува обична фарса, суштината е дека тие што се во оваа зграда овде веќе се сложиле на тоа кое што го нарекуваат модифициран последен предлог, а во суштина е ништо повеќе отколку директен удар врз македонскиот идентитет. Тоа се луѓето кои што ќе останат запаметени во македонската историја како луѓе кои што го распродаваа идентитетот македонски за да ги зачуваат своите фотелји уште неколку месеци“,
рече Мицковски.
Според него она што ќе се случува овие два дена во рамките на Парламентот е обична фарса бидејќи само 41 глас се доволни за да т.н. заклучоци или тој лист хартија да бидат усвоени.
„Јас навистина не знам што друго да кажам освен тоа дека треба да кажат НЕ во последен момент. Претпоставувам дека барем малку има македонско во нив и ако е така тогаш ќе кажат НЕ. Бидејќи, ќе повторам уште еднаш, ова што се нуди не е почеток на преговори за Македонија, ова што се нуди е сликање во Брисел. За да ги отпочнеме преговорите потребно е да биде променет Уставот, а ние како ВМРО-ДПМНЕ јасно и гласно кажавме дека Уставот нема да се промени и покрај шпекулациите на одредени слуги и платеници на власта дека постоеле вакви или такви структури во парламентот“,
додаде Мицковски.
Тој уште еднаш рече дека ВМРО-ДПМНЕ нема да гласа за измените на Уставот, а нема да гласаат мислам ниту пратениците од СДСМ откако ќе го видат Протоколот кој ќе го потпише Бујар Османи. Затоа што тој е толку лош, што се уште верувам дека кај некои од пратениците од СДСМ постои малку македонско затоа што кога ќе го прочитаат предлогот односно протоколот којшто ќе го потпише Бујар Османи ќе се предомислат и ќе се проколнуваат самите себеси затоа што и воопшто дозволиле да гласаат за ова што се нарекува последен модифициран предлог.
На новинарско прашањето што ќе и каже на претседателката на Европската комисија Урсула фон дер Лајен, Мицковски рече дека неговиот одговор ќе биде дека ова е Македонија, ова е македонски народ, со своја традиција, кој со векови се борел за своја сопствена држава, кој има своја култура која е со векови, кој што говори на македонски јазик и е горд заради тоа. Тој и порача на цела Европа и на бугарската јавност дека сето ова со корумпираната политичка елита ќе трае многу кратко, а потоа нагласи дека доаѓа Влада која ќе нема намера да го промени Уставот бидејќи, како што рече тој, овие два документа кои се на маса имаат хегемонистички, асимилаторски карактеристики да го бугаризираат македонскиот народ, а тие на тоа нема да се согласат.