Изборите за советници во Тетово се одржуваат откако доскорешните не успеаја до 31 март годинава да ја усвојат завршната општинска сметка согласно членот 75 од Законот за локална самоуправа. На 20 август ќе се гласа и во две други општини, но за градоначалници
Денеска почна кампањата за вонредните избори за советници во Советот на Општина Тетово, кои ќе се одржат на 20 август годинава.
Лидерот на СДСМ, Димитар Ковачевски, на средба со тетовци и на прес-конференција побара доверба од граѓаните за листата на социјалдемократите предводена од Глигорије Стојановски.
„Сакам да ги повикам тетовчани да го дадат својот глас за листата на СДСМ, за листата на советници со носителот Глигорије Стојановски кој е докажан заедно со другите советници кои се угледни и препознаени имиња и подготвени да го дадат својот максимум за Тетово. Тоа се чесни, работливи, одговорни луѓе, ваши комшии кои знаат сè што му е потребно на Тетово. Повеќе зеленило, почиста општина, целосна гасификација, надминување на проблемите со водоснабдувањето, но и нов економски развој и подобри услуги што ќе ги нуди општината на граѓаните. Сето ова преку конкретни проекти е наведено во програмата со која кандидатите на СДСМ излегуваат на овие избори“,
рече Ковачевски од Тетово.
Кампањата која започна денеска ќе трае до 18 август на полноќ, по што стапува изборниот молк кој ќе трае до затворањето на гласачките места на 20 август.
За вечерва промотивна конвенција на кандидатите за советници ќе има и Алијанса за Албанците, а настан исто така ќе има и независната советничка листа Подобро за Тетово.
На позитивен резултат и зголемување на бројот на советници во новиот Совет, како што изјави Христијан Мицкоски пред десетина дена, се навева и ВМРО-ДПМНЕ. ДУИ, пак, веќе објави дека на овие избори ќе настапи со комплетно нова листа на кандидат за советници.
Изборите за советници во Тетово се одржуваат откако доскорешните не успеаја до 31 март годинава да ја усвојат завршната општинска сметка согласно членот 75 од Законот за локална самоуправа.
На 20 август ќе се одржат и избори за градоначалници на општините Маврово и Ростуше и Центар Жупа. Во овие општини ова ќе биде трета среќа со оглед дека на локалните избори во октомври лани и неколку месеци подоцна, немаше доволно излезени граѓани на гласање за да може да се изберат градоначалници.