Синот на починатиот Зоран Трендафиловски вели дека не им била дадена можност да го видат телото пред да го погребаат. Здравствената книшка која ја добиле е на друг починат пациент, но роднините на тој пациент тврделе дека го виделе телото „преку прозор“. Кај нив не стигнала никаква книшка
Кумановец починал на Инфективната клиника во Скопје, а посмртно на семејството им биле вратени туѓи здравствени документи.
Синот на починатиот Зоран Трендафиловски вели дека кога отишол да ги земе неговите лични предмети, добиле здравствена книшка од друг пациент кој починал на Инфективната клиника.
Во изјава за „360 степени“ Филип Трендафиловски вели дека ова било „капак“ на целата голгота што ја проживеале од моментот кога татко му се разболел се до неговата смрт.
„Нѐ вознемири до толку што се прашувавме дали навистина го закопавме татко ми, бидејќи не го видовме телото поради протоколите. Контактирав со другото семејство. Ми рекоа дека ним им било дозволено да го видат телото преку прозор. Нивната книшка ја добивме ние, а тие велат не добиле никаква“,
вели Трендафиловски.
Тој посочува дека овој пропуст само го зголемил неговиот сомнеж за тоа дали татко му бил лекуван како што треба.
„360 степени“ контактираше и со другото семејство, кое сака да остане анонимно, за, како што велат, да не ја зголемуваат болката од загубата. Потврдија дека имало грешка, но не се сомневаат во болничкиот третман.
Министерство за здравство: Книшката и лекувањето не се поврзани
Министерството за здравство нема точни информации за случајот со помешаните документи. Велат дека поради метежот на Клиника е можно да имало ненамерен пропуст.
„Доколку семејство на пациент, како што тврдите, добило погрешна здравствена легитимација, тогаш станува збор за пропуст, кој ненамерно се случил со оглед на фактот дека на КИБФС се лекуваат 160 пациенти, кои најголем дел се во исклучително тешка клиничка слика. На истата клиника лекарите и медицинскиот персонал се соочуваат со преку 200 пациенти дневно. Дневно на КИБФС се случувало да има до 500 амбулантни прегледи. Документациите на сите пациенти се средуваат на едно место, оттука не се исклучува можноста дека настанала и грешка и била вратена погрешна здравствена легитимација како што тврдите“,
велат од Министерството за здравство.
Синот на Трендафиловски вели дека сѐ уште не знаат од што починал татко му, бидејќи, како што тврди, со денови не може да го добие отпусното писмо од болница, туку добиле само потврда за смртта.
Тој и претходно на социјалните мрежи се пожали на болничкиот третман на својот татко, посочувајќи дека едвај успеал да биде хоспитализиран на Инфективната клиника. Тврди дека татко му по неколку дена лекување имал негативен резултат за ковид-19, па нејасно му е зошто продолжил да се лекува на Инфективната клиника. Вели дека погрешните документи што ги добиле посмртно дополнително отвораат прашања на кој начин бил лекуван Трендафиловски.
Од Министерството за здравство велат здравствената легитимација и лекувањето не се поврзани. Ако има сомнежи за лекарска грешка, порачаа семејството да пријави во Државниот здравствен и санитарен инспекторат.
„Здравствената легитимација служи за идентификација на пациент и за проверка на статусот на неговото здравствено осигурување. Терапијата што му се дава на пациентот додека е хоспитализиран се пишува на болничка листа, која е прикачена на метална подлога прицврстена на болничкиот кревет на секој пациент. Податоците за пациентот се пишуваат на исписна листа. Здравствената легитимација на пациентот не е поврзана со неговите терапии, односно со медикаментите што му се даваат додека е на лекување во установата. Што се однесува до делот поврзан со лекувањето на пациентот, доколку кај семејството постои сомнеж дека лекарите и медицинскиот персонал на КИБФС не постапиле по протоколите за лекување на пациент, ве молиме случајот да го пријавите во Државниот здравствен и санитарен инспекторат за да се изврши инспекциски надзор“,
ни рекоа од Министерството за здравство.
Од Инфективната клиника, до објавувањето на овој текст, не добивме став за случајот.