Во ОЈО за гонење организиран криминал и корупција сега работат 11 обвинители, вклучувајќи ја и новата шефица, а отворен е оглас за уште тројца. Хаџи Василева вели дека се предвидени и десет нови финансиски експерти за да можат обвинителите паралелно со криминалистичките да водат и финансиски истраги

Во јавните обвинителства во земјава, според грубата процена на Искра Хаџи Василева, недостигаат околу една третина од потребните обвинители и околу две третини од кадарот во стручните служби. Новата шефица на Основното јавно обвинителство за гонење организиран криминал и корупција (ОЈО ГОКК) во интервју за „360 степени“ на МРТ 1 рече дека недостигот од стручни соработници им создава дополнителна работа на обвинителите што ги водат предметите.
„Ако отприлика, грубо земено, некоја третина недостасува кадар како обвинители, недостасува двојно повеќе кадар како стручна служба – околу две третини, дури и загрижувачки број на кадар кој недостасува во службата, што пак неминовно налага дополнителни обврски и притисок кон самите јавни обвинители. Притисок во смисла на количина на работа која ја имате како предметен обвинител“,
рече Хаџи Василева.
Како засилување од кое очекува брзо да се видат резултати, таа ги издвои финансиските експерти. Предвидени се десетмина, но смета дека и со половина од нив обвинителите би добиле стручна помош што им е потребна уште додека трае криминалистичката истрага.
„Да почнеме и со пола од таа бројка, јас сум убедена дека и тоа како ќе влијае на веднаш видлив резултат, бидејќи на јавните обвинители конкретно оваа работа им е и тоа како потребна: водењето паралелна истрага, финансиска со некаква криминалистичка“,
рече таа.
Во ОЈО ГОКК во моментов, покрај Хаџи Василева, работат уште десет обвинители. Отворен е оглас за тројца нови, а изборот од пријавените кандидати треба да го направи Советот на јавни обвинители.
За истражниот центар на ОЈО ГОКК, Хаџи Василева оцени дека веројатно е во најдобра состојба во споредба со центрите во основните обвинителства. Истражителите главно доаѓаат од правосудната полиција, а нивниот состав се менува. Особено недостигаат финансиски истражители и форензичари специјализирани за компјутерски криминал. Од дигитализацијата, пак, очекува побрзо постапување и намалување на трошоците.
Беше прашана и дали на средбата со државниот јавен обвинител станало збор за најавата на премиерот Христијан Мицкоски за постепено зголемување на обвинителскиот буџет. Хаџи Василева не кажа дали разговарале за тоа.
„Јас би оставила да покаже времето. Се разбира, секое унапредување на нашата состојба во смисла на буџетски ресурси е и обврска и сум убедена дека така и ќе биде. Унапредување кога велам, мислам на зголемување на буџетите и зголемување на уште повеќе она што значи кадар“,
рече таа.
За платите: Обвинителите се чувствуваат онеправдани
Во интервјуто стана збор и за разликата во постапувањето на Уставниот суд по иницијативите за коефициентите за пресметка на платите на судиите и на обвинителите. Според Хаџи Василева, иницијативите биле поднесени истовремено, а Судот за судиите одлучил пред повеќе од половина година. Обвинителите сè уште чекаат одлука.
„Во однос на нашата иницијатива како јавни обвинители не е одговорено, и тука се создава едно чувство на неправда и неправичност кај јавните обвинители“,
рече Хаџи Василева.
Прашана за аргументот на одделни уставни судии дека Обвинителството е самостојно, но не и независно, Хаџи Василева посочи дека, колку што ѝ е познато, таков став досега не е изнесен во формална одлука на Уставниот суд. Затоа, рече таа, ќе почека Судот да се произнесе по иницијативата.
