Мајонезот воопшто не се користел како примарна храна туку во многу мали количини под 10%, како додаток при подготовката на свежа паштета од туна и од пилешко месо. Со новите упатства за подготовка на оброците мајонезот целосно ќе биде исфрлен, велат од МТСП
По случајот со појавата на салмонела кај 31 дете во кумановската градинката „Ангел Шајче“, од Министерството за труд и социјална политика (МТСП) најавуваат дека ќе направат целосна ревизија на нормативите и стандардите за исхрана и оброци на децата во градинките и дека целосно ќе го исфрлат мајонезот од употреба, кој досега тврдат дека се користел како додаток, а не примарна храна.
„Под целосна ревизија ќе бидат и рецептите за подготовка на оброци за децата коишто ги користат установите за воспитание на децата, со цел да се унапредат и да се усогласат со најновите истражувања за здрава исхрана, но и за потребите на децата во делот на нутритивната вредност. Упатствата за подготовка на оброците во детските градинки се изработени од републичкиот Завод за домаќинство и за жал подолг период не се променети. Од тие причини, во соработка со експерти од областа, работиме на подготовка на нови упатства кои ќе значат отстранување на сите производи кои не ги задоволуваат стандардите за здрава исхрана“,
велат од МТСП.
За конкретниот случај во Куманово, велат дека внимателно го следат и се во контакт со надлежните институции, како и дека ќе ги преземат сите мерки за да се утврди чија е одговорноста.
„Во однос на прашањето што се поставува во јавноста дали мајонез се користи во исхраната на децата, сакаме да информираме дека мајонезот воопшто не се користел како примарна храна туку во многу мали количини под 10%, како додаток при подготовката на свежа паштета од туна и од пилешко месо. Со новите упатства за подготовка на оброците мајонезот целосно ќе биде исфрлен“,
велат од Министерството.
Според информациите од Куманово, салмонелата била присутна во пакувања од мајонез, а истата досега била потврдена кај 31 дете.
„Заклучно со денешниот ден од почетокот на епидемијата, односно од 10 мај до сега има вкупно пријавено 66 деца, со симптоми на акутно труење со храна, покачена температура, малаксаност, чести проливи. Кај 31 дете е изолирана салмонела, во тек се испитувања на уште на 5 копрокултури, кои пристигнаа во текот на денешниот ден. Направени се и вонредно здравствено-хигиенски прегледи на 12 вработени од кујните во трите објекти и кај тројца е изолирана салмонела“,
изјави денеска д-р Јадранка Стаменковска, епидемиолог во Центарот за јавно здравје во Куманово.