Мерката, која е со цел да се спречат метежите и да се заштити здравјето на граѓаните, ќе почне да се спроведува од вторник, веднаш по Велигден
Од идниот вторник по велигденските празници припадниците на Армијата ќе го контролираат редот пред банките, поштата, маркетите и градскиот пазар во Велес за да се спречат метежите од граѓаните, соопшти денеска градоначалникот на Велес, Аце Коцевски, на прес-конференција.
Оваа одлука денеска ја донел Општинскиот штаб за заштита и спасување
„Имајќи ги предвид искуствата од минатиот викенд, се преземаат мерки и активности за организирање на долгиот полициски час кој претстои и дека со наредба на Државниот кризен штаб на располагање се ставени припадниците на Армијата. Тие по завршувањето на полицискиот час идниот вторник ќе помогнат при одржувањето на јавниот ред и почитување на мерката за држење определено растојание на граѓаните пред влезовите на банките, Градскиот пазар, зградата на поштата и пред влезовите на маркетите“,
соопшти Коцевски.
За ова ќе биде подготвен оперативен план, кој предвидува асистенција и на претставниците на СВР Велес, АРМ, ТППЕ Велес и на ЈКП „Дервен“ за заштита на здравјето на жителите.
Оваа мерка од пред неколку дена се спроведува во Прилеп, каде што пред банките и маркетите во градот се поставени налепници на кои пишува „Стој овде“.