Италијанскиот весник „Месаџеро“ објави дека поради самостојната и самоиницијативна одлука на „Фајзер“, во прашање е доведена втората задолжителна вакцинација на оние што веќе ја примиле првата доза во Италија
Данска, Грција и Австрија ќе побараат од Европската агенција за лекови (ЕМА) брзо и „небирократско“ одобрување на вакцината на „Астра Зенека“, изјави денеска австрискиот канцелар Себастијан Курц.
Тој рече дека е договорена заедничка акција со премиерите на Данска и Грција.
„’Астра Зенека“ е вакцина што ја развиваат познати експерти, ЕМА ги има сите информации за таа вакцина од 12 јануари. За мене е важно да се залагаме за побрза одлука на ЕМА“,
рече тој и побара итна и небирократска одлука за одобрување на вакцината.
Потсети дека вакцината веќе се користи во Велика Британија и некои други држави и дека ЕМА треба да одржи седница на крајот на месецот во врска со одлуката за одобрување на вакцината на „Астра Зенека“.
„Секој ден е важен за нас. Новата мутирана варијанта е очигледно поефикасна, така што нѐ става пред голем предизвик. Секој ден што се добива со побрзо одобрување на вакцината е ден во борбата против вирусот“,
нагласи Курц и побара и ЕУ да донесе јасна стратегија во врска со патувањата, односно влез од држави надвор од Унијата.
Ваквиот чекор на овие европски земји се случува во време кога компанијата „Фајзер“ минатата недела најави дека ќе се забави испораката на вакцини во Европа бидејќи ќе се работи на проширување на производствените капацитети на фабриката во Белгија.
Тоа предизвика реакции кај европските земји, кои веќе се соочуваат со недостиг на вакцини.
Италијанскиот весник „Месаџеро“ објави дека поради самостојната и самоиницијативна одлука на „Фајзер“, во прашање е доведена втората задолжителна вакцинација на оние што веќе ја примиле првата доза во Италија, а доколку не бидат вакцинирани по вторпат навреме, залуден ќе биде првиот дел од вакцинацијата.
Исто така, весникот открива дека во таков случај, државите што имаат потпишано договори за набавка на вакцината „Фајзер“ не можат да влијаат врз динамиката на испорака бидејќи тоа не е предвидено во договорот.