Американската компанија чија вакцина против ковид-19 е најкористена во светот, вчера најави дека ќе ја забави испораката на вакцини кон крајот на јануари и почетокот на февруари, поради проширување на производствените капацитети во фабриката во Белгија
Сигурноста на програмите за вакцинација е загрозена, соопштија европските влади откако американската фармацевтска компанија „Фајзер“ објави привремено одложување на снабдувањето со вакцини против ковид-19, поради реновирање на фабриката во Белгија.
Вакцината, развиена од „Фајзер“ и германскиот партнер „Бионтек“, започна да се испорачува во ЕУ кон крајот на декември, но на состанокот оваа недела, 9 од 27-те влади на ЕУ се пожалија на „недоволни“ дози, објави Гардијан.
„Фајзер“ првично рече дека испораките биле на распоред, но вчера најави дека ќе има привремени одложувања при испорака кон крајот на јануари до почетокот на февруари, поради проширување на капацитетите за производство.
„Оваа ситуација е неприфатлива“,
сметаат министрите за здравство и социјала од шест земји на ЕУ во писмото до ЕК.
„Ова не само што влијае на планираните распореди, туку го намалува и кредибилитетот на процесот на вакцинирање“,
посочуваат министрите на Шведска, Данска, Финска, Литванија, Летонија и Естонија.
Германија, која е најголемиот купувач на вакцината “Фајзер/Бионтек“ во Европа, ја нарече одлуката изненадувачка. Канада исто така соопшти дека е засегната со ваквата одлука затоа што снабдувањето доаѓа од фабриката на „Фајзер“ во Белгија.
Претходно, и Норвешка и Литванија реагираа на ваквата одлука на „Фајзер“, додавајќи дека единствено сакаат испораките да продолжат според предвидениот рок.
Претседателката на Европската комисија Урсула фон дер Лајен рече дека од „Фајзер“ добила уверување дека испораките планирани за ЕУ во првиот квартал нема да бидат одложени.
„Фајзер“ тврди дека промените ќе обезбедат значително зголемување на дозите кон крајот на февруари и март.