Турскиот потпретседател соопшти дека досега загинати се најмалку 284 лица, а 2 323 се повредени. Урнати се 1 710 згради
Засега нема информации дали во катастрофалниот земјотрес што утрово ја погоди југоисточна Турција има повредени наши граѓани, но од МНР велат дека веднаш стапиле во контакт со Амбасадата на Северна Македонија во Анкара и Генералниот конзулат во Истанбул кои се во постојана комуникација со турските надлежни институции.
Дипломатско-конзуларните претставништва на земјава, велат од МНР, се на 24-часовно располагање за наши државјани за сите евентуални прашања.
Од МНР објавија и телефонски броеви за контакт од Амбасадата во Анкара, Конзулатот во Истанбул и СОС-телефонот во Скопје:
- Анкара: +905394569710;
- Истанбул +905456149777;
- СОС-телефон на МНР во Скопје: +38975273732.
Последните информации во врска со разорниот земјотрес што ги објавува турската новинска агенција Анадолија се дека загинале најмалку 284 лица, а 2 323 се повредени во вкупно 10 провинции. Урнати се и 1 710 згради.
Бројките за турските медиуми ги споделил потпретседателот на државата Фуат Октрај.
Според турската Управа за справување со кризи и вонредни состојби (АФАД), земјотресот бил со јачина од 7,4 степени според Рихтеровата скала се случил во 4:17 часот по локално време, а епицентарот бил во областа Пазарџик во јужната турска провинција Кахараманмарас.
Земјотресот бил со длабочина од седум километри.
Покрај Пазарџик, земјотресот најмногу ги погоди и провинциите Газиантеп, Санлиурфа, Дијарбакир, Адана, Адијаман, Малатија, Османије, Хатај и Килис.
Земјотресот бил почувствувал и во соседните Либан и Сирија.