Ова законско решение предвидува да му се признае на Макпетрол сопственост на 50 отсто од гасоводот во земјата и да му се исплати цена од 33 милиони евра
Според опозицијата, не може да има закон за спор зашто тој се решава со медијација и во судовите
Собранието по повеќе од дваесет часа, утрово ја прекина расправата по Предлог законот за решавање на спорот помеѓу Владата на Република Северна Македонија и Макпетрол АД Скопје по пат на спогодба, по скратена постапка. Дваесеттата седница на чиј дневен ред е овој Предлог-закон ќе биде дополнително закажана.
Ова законско решение предвидува да му се признае на Макпетрол сопственост на 50 отсто од гасоводот во земјата и да му се исплати цена од 33 милиони евра.
Во текот на расправата која траеше и изминатата ноќ, пратениците од опозицијата со говори, реплики и контрареплики се обидуваа да го спречат донесувањето на овој закон.
Тие сметаат дека предложеното законско решение е еден од серијата закони што ја убиваат правдата и ги прекршуваат основните начела на правото.
Според нив, не може да има закон за спор зашто тој се решава со медијација и во судовите. Не смее, нагласија, Собранието да прерасне во квази суд, бидејќи тоа е надлежно само за ратификации на договори. Повикувањето на акти од минатото од 1987 година кои можат да се искористат како искуство, е недозволиво, посочија пратениците од опозицијата, а институциите не треба да се затскриваат зад законот, туку да го решат спорот на начин каде и како што треба. Тие очекуваат претседателот да се одважи и да стави вето ако овој закон сепак биде изгласан.
Александар Николоски од ВМРО-ДПМНЕ рече дека ова што го прави власта е исто како со промената на името.
„Македонската јавност треба да знае дека денес на Божиќ не држите тука во Собрание и дека толку ви е голема маката што на Божиќ мора да седиме тука за да му даде Собранието дозвола на Зоран Заев, договор каков што ниту еден премиер претходно не сакал да потпише и се тужел, одел по судови со компанијата со која требало да потпише. Ова е отприлика како промената на името – ниту премиер од ВМРО-ДПМНЕ, ниту премиер од СДСМ претходно потпишуваше промена на името, ниту промена на Уставот. Дојде овој се најде најпаметен и потпиша промена на Устав со цел промена на име и еве овој најпаметен решава да потпише договор, затоа што се за него е пазар. Седнува и се пазари и тоа како ќе се испазари гледа дали му одговара цената“,
рече Николоски.
Во вчерашната расправа, во реплика, министерот за економија Крешник Бектеши посочи дека треба да се прави разлика помеѓу номиналната и актуелната вредност на секое АД и додаде дека во 2006 година кога била основано АД ГА-МА номиналната вредност била 1 500 денари за акција, а сега во моментов е 12 500 денари.
„Само гасоводот Клечовце-Штип долг 61 километар чини 71 милион евра. Со изградбата на гасоводот како држава ќе добиеме поевтин енергенс и ќе се намали загадувањето на животната средина, а индустријата ќе стане поконкурентна на глобално ниво“,
рече Бектеши.
Пратениците од владејачкото мнозинство во дискусиите истакнаа дека проценката за вредноста на гасоводот е направена по сите стандарди од една домашна и една странска институција и е на 300 страници и оти покрај гасоводот во неа се ставени и други материјални добра и машини со што вкупната вредност е 33 милиони евра.