Хрватскиот премиер посочи дека Северна Македонија во 2000 година, кога се одржал самитот во Загреб, била пред Хрватска во институционалното приближување кон ЕУ, но сè уште не ги започнала пристапните преговори. Две држави, вели тој, во периодот од 2005 до 2026 година ѝ одзедоа 21 година на земјава во процесот на приближување кон Унијата
Хрватска, додава Пленковиќ, не го прифати тој пристап и кон Црна Гора настапува конструктивно, но истовремено инсистира на решавање на прашањата што ги смета за важни за европските вредности и добрососедските односи
Хрватскиот премиер Андреј Пленковиќ ја посочи Северна Македонија како пример за тоа колку долго може да трае патот кон Европската Унија и нагласи дека и покрај подготвеноста на Хрватска да го поддржи европскиот напредок на Црна Гора, Загреб очекува решавање на отворените прашања меѓу двете земји.
Пред состанокот на Европскиот совет во Брисел, Пленковиќ потсети дека на самитот во Загреб во 2000 година Македонија била пред Хрватска во институционалниот процес на приближување кон ЕУ, но дека и по повеќе од две децении сè уште нема започнато пристапни преговори.
„Го имате примерот на Северна Македонија, која, кога го имавме самитот во Загреб во 2000 година, беше пред Хрватска во институционалниот аспект. Тие сè уште не ги започнале преговорите. Постојат две држави кои, да речеме, од 2005 до 2026 година ѝ одзедоа 21 година на Северна Македонија во институционалното приближување кон Европската Унија“,
рече Пленковиќ.
Додаде дека Хрватска не го прифатила тој пристап и кон Црна Гора настапува конструктивно, но истовремено инсистира на решавање на прашањата што ги смета за важни за европските вредности и добрососедските односи.
„Хрватска не го прифати тој пристап. И покрај тешкото наследство, ние пристапивме кон Црна Гора многу конструктивно. И во тој конструктивен процес ги издвоивме оние точки за кои веруваме дека Црна Гора треба да ги исполни бидејќи тие се дел од она што треба да го преземе како европски вредности со своето идно членство во Европската Унија“,
вели хрватскиот премиер.
Осум барања на Загреб што Подгорица треба да ги исполни за затворање на преговорите со ЕУ
Според него, Хрватска јасно ги посочила осумте нерешени прашања со Црна Гора, за кои, според него, со години нема напредок.
Меѓу нив се обесштетувањето на поранешните затвореници од логорите, поставувањето спомен-плоча во логорот Морињ, процесирањето на воените злосторства, разјаснувањето на судбината на 14 исчезнати лица, имотноправниот статус на Хрватите во Црна Гора и прашањето за границата.
Пленковиќ нагласи дека овие прашања им се познати на црногорските државни претставници и дека е потребно да се најдат решенија.
„Сакаме Црна Гора да напредува, но сакаме и овие прашања да бидат решени. Сега е време да ги решиме“,
порача хрватскиот премиер.
„Еуроњуз“: Германија врши притисок врз Хрватска да ги реши споровите со Црна Гора
„Еуроњуз“, повикувајќи се на анонимни дипломатски извори, објави дека Германија го засили притисокот врз Хрватска за решавање на отворените прашања со Црна Гора, со цел да се избегне блокада на црногорскиот пат кон членство во Европската Унија.
Хрватскиот премиер Андреј Пленковиќ изјави дека германскиот канцелар Фридрих Мерц воопшто не ја отворил оваа тема во разговорите со него.
Според него, медиумските информации можеби се однесуваат на разговори одржани пред неколку дена на маргините на состанок на ниво на државни секретари.
„Мерц и јас имаме многу добри односи, седиме еден до друг на состаноците на Европскиот совет со години“,
рече Пленковиќ.
Повтори дека Хрватска има конструктивен пристап кон европската интеграција на Црна Гора, за разлика од искуството на Загреб за време на сопствените пристапни преговори, кога, како што рече, поради блокади изгубил три до четири години.
Пленковиќ посочи дека Хрватска ги поддржува пристапните преговори на Црна Гора од 2012 година, ѝ помогнала со преводи на европското законодавство и ѝ давала поддршка во различни области.
„Имавме конструктивен пристап кон Црна Гора, ги поддржувавме нејзините пристапни преговори од 2012 година, ги споделивме преводите на целото европско законодавство и помагавме во сите аспекти. На крајот, се согласивме да затвориме 21 поглавје“,
заклучи хрватскиот премиер.