По серијата протести, штрајкови на синдикати и барања за покачување на платите во различни области од јавниот сектор изминатиов период, од осум часот денеска и Управата за водење матични книги е недостапна за граѓаните. Независниот синдикат објави дека стапуваат во генерален штрајк со барање за колективен договор на ниво на работодавач, линеарно покачување на платите и унапредување на работните позиции.
Оттаму велат дека 90 отсто од Управата, односно сите подрачни одделенија се во штрајк. Додека трае штрајкот, нема да се издаваат изводи од матичната книга на родени, венчани и умрени. Но, наспроти неспорното законско право на штрајк, во овој случај станува збор за институција со лоша репутација меѓу корисниците на нејзините услуги, со „негативна оценка“ од Државниот завод за ревизија (ДЗР) и со проблематични тендери кои се под лупа на Државната комисија за спречување на корупцијата (ДКСК).
ДЗР: Управата греши при печатење изводи, подрачните одделенија не водат домаќинска евиденција
ДЗР го чешлаше работењето на Управата во 2019 година. Ревизорите навеле неповолно мислење во однос на вистинитоста и објективноста на финансиските извештаи и се резервирани за усогласеноста на Управата со законската регулатива. Оттаму констатираат и дека Управата за матични книги греши при печатење на изводите.
„При издавањето на изводите се прават грешки при нивното печатење. Вкупниот број на издадени погрешни изводи во 2019 година изнесува 21 957 изводи, односно 4 проценти во вкупно издадените изводи. Управата ја нема утврдено одговорноста за надоместување на трошокот во случај на настаната грешка при издавање на изводите, поради што за овие изводи во 2019 година не е уплатен приход на сметката на Управата во износ од 1 099 000 денари и приход за административна такса во буџетот на РСМ во износ од 2 196 000 денари“,
нотира Ревизија.
Ревизијата констатирала и дека се издадени 98 381 извод повеќе од тоа што стоело во евиденцијата на Управата.
„Ваквата состојба е резултат на ненавременото раздолжување од страна на одговорните лица на подрачните одделенија во временски период подолг од еден месец, утврден во интерното упатство за наплата и чување на реализираните барања по основа на наплативи обрасци, како и неажурираната материјална евиденција на издадени изводи“,
се вели во ревизорскиот извештај.
Дополнително, ревизорите утврдиле дека не се водела матична евиденција на изводите по поединечен сериски број, а констатирани се и неправилности во процесот за јавните набавки. Никој не поднел забелешки на нацрт-извештајот на ревизорите.
Покрај ова, неделникот „Фокус“ објави дека од 2019 година, за набавките за хардвер, софтвер и дигитализација, Управата потрошила најмалку 1,5 милиони евра. Од нив, речиси половина милион евра на тендер добила „Новатек инв“, компанија која е регистрирана во Централниот регистар само еден месец пред објавување на огласот и само три месеци пред да се склучи договорот за јавна набавка. Притоа, немало никакви критериуми во однос на капацитетот и претходното искуство на фирмата туку единствено се барало вработените кои ќе ги скенираат матичните книги и ќе внесуваат списи да поседуваат одредени сертификати.
По написите на „Фокус“, Државната комисија за спречување на корупцијата лани отвори предмет по допрен глас. Од ДКСК велат дека случајот сè уште се работи.
Инаку, Управата спроведува процес на дигитализација на услугите, кој би требало да заврши до крајот на годинава.